Norris-a hun a inher chhuak leh ta

Formula 1 champion lai Lando Norris chuan tun season-a a vawi khat nan hnehna a chang a, Pathianni zan Hungarian Grand Prix-ah phu takin pakhatna a ni. McLaren driver tan tun season-a podium vawi thum lawnna niin table-ah panganaah a awm bawk.

Champion lai nge nge

Hungaroring-a intlansiakah McLaren driver ten bul an ṭan ṭha a, Oscar Piastri chuan hmahruai nghalin a teammate Norris chuan a zui nghalin, hun rei tak McLaren driver te hian hma an hruai dun.

Kum 26 mi Norris-a tlan ṭha tluan zak a, Max Verstappen leh Andrea Kimi Antonelli ten a hmahruaina chhuhsak ve zeuh mah se a lehpel leh nghal zel thei a, tuma tluk rual lohin hnehna a chang.

A tlan ṭan aṭanga kawng kawi hmasa berah Norris a kual fuh tawk lo a, a teammate Piastri-a'n a lehpel nghal. Mahse a tawp a khar ṭhat avangin inelna neih chhung zawnga a tihsual awmchhun hian sawi zui a hlawh lo.

British driver Norris chuan, "Hetiang track inlehpelh harsatna hmunah, ka ṭhianpa Piastri ka zui pha zel thei kha ka vanneihpui a, second 0.8 vel lek inthlau chunga lap 40 dawn ka tlan thei khan inrintawkna min pe a ni.

Vawiinah hian ni dang aiin ka tlan chak zualin ka hria, mahse a chhan ka hre lo. Car inang hmang reng chunga ka chakna chhan hi ka vanneih vang a ni a, ka thawhrim rah ka hmu niin ka hria. Inelna ka hmachhawn tawhah ka chet ṭhat ber ṭum niin ka hria," a ti.

Teammate vanduai

Norris a chak laiin Piastri erawh a vanduai a, hmahruaitu pawh ni hman mah se a tlan tluan thei lo. Lap 38-naah a Williams driver Carlos Sainz Jr. nen an intai palh a, a car-ah chiang lo a awm tih a hmuh theeih nghal a, mahse hei hi Piastri vanduai inṭanna chauh a ni.

Kum 25 mi Piastri hian 'pit'-a a luh hnuah a car chu thuam ṭha leh nghal mah se a daih rei lo a, lap 56-naah pahnihna a nih laiin a gearbox-ah chiang lo a awm avangin track sirah a ding a, a tlan chhunzawm theih loh avangin a chhuak chhunzawm.

Australian driver hian table-ah pasarihna ni mekin season hmang chhe lo mah se a vannei tawk lo a, vawi hnih podium lawn ve tawh mah se vawi hnih bawk a chesual tawh a, season ṭanna intlansiakah khan anmnahni ram ngeiah a car dinhmun a chian loh avangin a tlan thei lo tawh bawk.

Engtin zel?

Norris-a dawt chiahah Red Bull driver Verstappen chu awmin pahnihna a ni a, driver pahnihte inthlauhna hi second 15 a ni. Norris leh Verstappen te hi season hmasaa inel ber an ni a, a tawpah Belgian driver hi point hnih chauha a hnufual avangin Norris a champion ta zawk. Season hmasa an hrechhuak ngei ang.

Pathumnaah tun season-a che ṭha tak Antonelli a awm leh a, Mercedes driver hian podium vawi kua a lawnna a ni a, vawi ruk lai hnehna chang tawhin table-ah hmahruaitu a nih chhunzawm zel.

Antonelli dawtah hian Ferrari driver pahnih Charles Leclerc leh Lewis Hamilton te an awm bawk a, Red Bull driver Isack Hadjar chu parukna niin George Russell chu pasarihna a ni pha hram.

British driver Russell hi Belgian GP-ah a hnampui Hamilton nen an intai avangin a tlan tluan thei lo a, Hungaroring-ah hnehna chan tum viau mah se a vanneih ṭum a ni lo a, Kum 41 mi Hamilton-a'n table-ah a lehpel bawk.