City-in Gvardiol thlung nghet dawn

Manchester City chuan an defender Joško Gvardiol contract pawt sei turin hma an la mek a, kum nga daih contract an ziahpui dawn a, thla hmasa khan mimal thilah an inrem tawh niin Fabrizio Romano-a'n a tarlang.

Gvardiol hian kum 2023 khan RB Leipzig aṭangin £77mtd bawr velin City hi a zawm a, 2028 thleng contract a la nei a, mahse a contract thar a ziak a nih chuan kum 2031 thleng Etihad Stadium-ah a châm thei dawn.

Croatian defender hian Pep Guardiola hnuaiah player pawimawh a ni a, 2024-25 season khan Erling Haaland leh Kevin De Bruyne-te chungah awmin 'player of the year' atan thlan a ni nghe nghe.

Kum 24 mi Gvardiol hi Real Madrid chuan tun hnaiah an ngaihven a, season hmasa khan Barcelona pawhin an lo rim tawh a, mahse contract thar a ziah dawn takah chuan Spanish club liante hian an hawisan mai a fuh zawk ang.

City hi season tharah Enzo Maresca hnuaiah an khel tawh dawn a, centre back Nathan Ake leh John Stones te an chhuah tawh avangin Gvardiol a pawimawhna a sang lehzual dawn.

Hetihlai hian Maresca chuan Pep awm tawh lo mah se, Sir Alex Ferguson-a'n Manchester United a chhuahsan hnua an tlachhia ang kha an nih ve loh tur thu sawiin an ṭhenawm club a kâp zeuh.

Italian coach chuan, "Club in kei min ring hi ka tan chuan chawimawina sang tak a ni a, Pep kha tun hnai kum 15 liam taa khawvela coach ṭha ber zinga mi a ni a, chuvangin ka tan chona lian tak a ni.

Sir Alex chhuah hnua thil thleng kan hre vek a, hetianga tluchhe mai lo tur hian kan theihtawp kan chhuah dawn a, chumi tur chuan kalphung nghet tak kan nei bawkin ka hria," a ti.