Spurs an insiam ṭha zel

Tottenham Hotspur chuan Roberto de Zerbi hnuaiah insiamṭhat hna an thawk mek a, Pathianni zan khan New Zealand-a pre season an khelhah A-League champion Auckland FC chu 2-0 in an hneh.

Spurs tan Dane Scarlett-a'n minute 12-naah goal hmahruai a khung a, Richarlison-a'n minute 70-naah an chak nemnghehna goal a khung bawk. Auckland erawhin hun tawp thlengin goal an khung ve thei lo.

Kum 47 mi De Zerbi-a'n senior player zingah goalkeeper Brandon Austin, Archie Gray leh Manor Solomon te chiah bul a ṭantir a, nipui transfer-a an lak zingah Mateus Fernandes chiah inkhelin, Sandro Tonali chu mimal thil vangin squad-ah a awm lo. Heti chunga hnehna an chang thei hi Spurs tan lawmna tur a ni.

Season hmasaah beisei an phâk loh hnuah Spurs hian chet chhiat nawn an tum tawh lo a, nipui laiin Fernandes leh Tonali bakah, jan Paul van Hecke te lak nan £245 mtd an hmang tawh a, a thlawnin Andy Robertson, Marcos Senesi leh Martin Dubravka te an la lut tawh bawk.

Italian coach chuan inkhelh zawhah, "Kan match kha chu layer naupang zawkte tana hun ṭha a ni. Zinkawng thui tak kan zawh hnuah taksa chau tak chunga player ṭhenkhat khelhtir ka duh lo. He club-a ka luh tirhin tlang takin ka sawi tawh a, hlim lo leh chhuak duh an awm a nih chuan kan chelh reng dawn lo a, an chhuak mai tur a ni," tiin a sawi.

Eden Park-a inkhel Spurs te inkhel hi New Zealand chhunga mipa football match entu tam ber ṭum a ni a, mi 40,112 laiin a hmunah enin hei hian kum 2017-a New Zealand leh Peru ten World Cup qualifier an inkhelh ṭuma mipui entu tam ber record, mi 37,034 chu a khum ta a ni.

London club hi naktuk tlai dar 3:15-ah an inkhel leh nghal dawn a, Sydney FC nen season thar inbuatsaih nana an match thumna khelin an inhmachhawn dawn.