Sancho leh Al Rayyan an indawr

Jadon Sancho chu Manchester United-a a contract a tawp tawh a, Qatar Stars League club Al Rayyan chuan English winger hi an ngaihven hle niin khawthlang chanchinbu te chuan an tarlang.

Borussia Dortmund winger hlui Jadon Sancho hi Al Rayyan chuan hlawh tam tak pek intiamin lakluh an tum nia sawi a tam a, English winger hi indawrna an neihpui mek. Al-Rayyan hi 2021-a Colombian midfielder James Rodriguez lo la lut tawhtu an nih avangin sum lamah buaina an nei dawn lo.

Kum 26 mi Sancho hian Chelsea leh Aston Villa-ah te loan-a a khelh hnuah club thar a zawng mek a, 2016 hnuah a vawi khatna atan Qatar Stars League-a champion tum Al Rayyan chuan free agent a nih lai hian an lo dawr chat.

Qatar league sang berah hian khawvel huapa player langsar - Marco Verratti, Krzysztof Piatek, Roberto Firmino, Rodrigo Moreno, Pablo Sarabia leh Julian Draxler te an awm sa a, Sancho hi a insawn a nih pawhin thil mak a ni lo ang.

Manchester City academy chhuak Sancho hian United tan League Cup a chawi a, Chelsea tan Conference League nomawi chawiin, Villa chu Europa League-ah a champion pui bawk. Rinrawl ni pha lo mah se nomawi a chawi theih avangin leh a kum a la naupang avangin duhtu an la tam.