Fury leh Joshua inhmachhawn a hnai

British boxer ropui pahnih Tyson Fury leh Anthony Joshua te inhnek hun tur a hnai zel a, boxer pahnih hian inhmachhawn ngei turin contract an ziak fel vek tawh a, tunah chuan an inhnekna tur hmun chiah a la chiang lo.

Khawthlang media ṭhenkhatin an tarlan dan chuan boxer pahnih hian dollar maktaduai 100 ve ve chu an hlawh thei dawn a, Netflix-in en theih turin a pe chhuak ang.

Madison Square Garden, New York chu a hming a ri ring viau a, British fan-te chuan Wembley Stadium-ah ngei an duh thung. Joshua promoter Eddie Hearn chuan, "Thla thum vel liam ta khan inhmachhawn ngei turin inremna kan nei tawh a, Britain-ah ngei kan ti bawk.

"Joshua pawhin British fighter pahnih inhmachhawn tur a nih avangin, UK-ah ngei a duh thu a sawi a, ka ṭawm thlap a ni," a ti a, Joshua chuan, "Wembley hi chuan boruak danglam a keng bik a ni," tiin, UK-ah pawh stadium dang a ngaihtuah loh thu a sawi.

Hearn chuan, "Organiser lam hian US an duh a nih chuan sawi ṭhat leh a ngai ang," a ti a, Tyson Fury manager Spencer Brown pawhin, "Tyson pawhin Wembley ngeia tih a duh a, mahse, Wembley a nih loh pawhin a inhnukdawk chuang lo ang," tiin organiser-te thu an zawm tur thu a sawi tel thung.