Inter tana zai rem tur Eriksen

Serie A pahnihna Inter Milan chuan Milan khawpui ti hmingthangtu La Scala opera house-a Christian Eriksen thlalak pholangin Tottenham Hotspur midfielder an lakluh thu an puang. 

Season tawpa a contract hmang zo mai tur Eriksen hian nipui transfer lai khan Spurs hi chona thar hmachhawn tura chhuah a duh thu a hrilh a, a tirah London club-in chhuah phal lo mah se pound maktaduai 16.9-in an hralh ta. 

Kum 27 mi midfielder hian Inter tana June 2024 thleng khel turin contract a ziak a, kum khatah pound maktaduai 6.5 a hlawh ang - a contract-ah hian a khelh ṭhat dan a zira bonus pek tur pawh a tel a ni. 

Spurs tan match 305-a khelha goal 69 khungtu Eriksen chuan, "Chona thar hmachhawn hun a lo thleng ta a, club ropui tak Inter tana Serie A ka khel tur hi ka lawm takzet a ni," a ti. Tottenham hian Eriksen chhuah thu an puan rualin Real Betis aṭanga loan-a an hawh mek Giovani Lo Celso chu a ngheta an lakluh thu an puang ve nghal a, kum 2025 thleng atan contract an ziahpui. 

Argentine midfielder hi loan-a an hawh khan season tawpa pound maktaduai 34-a lak ngheh theihna a awm a, January-ah pound maktaduai 27-a lak ngheh theih dan a awm tel bawk - nipui nghaha sum sen belh ai chuan Spurs hian lak ngheh vat an thlang ta a ni. Spurs hian PSV Eindhoven forward Steven Bergwijn chu pound maktaduai 27-a lalut turin a thuphunga inremna an neihpui bawk.