Hmangaihkima goal ropui a tawk lo

I Day Football-ah nimin khan Lawngtlai club MLS FC-in Aizawl FC lakah chak theihna hun ṭha an nei a, injury time-ah K. Lalhmangaihkima'n goal ropui a khung. Mahse, IFL club Aizawl FC tan Rohmingthanga'n injury time-ah pawh minute riatnaah siphurh a sut a, 2-2 in inkhel a tawp.

RG Stadium-a inkhelah Aizawl FC-in ISL leh IFL player lak theih mah se an player neihte an ringtawk a, season liam taa an player pawimawhte belh nan academy player an ring. MLS lam pawh coach F. Lalrozama hoin inbuatsaihna an nei ṭha tih lantir bawk.

First half-a goal a luh loh hnuin minute 54-naah goal khung thei bik Zomuansanga'n box chhungah a theihna sang tak lantirin goal hmahruai a khung. Aizawl FC goal bawh a na a, penalty aṭangin Khawbel tlangval Zomuana'n hmahruai belh theihna hun ṭha nei mah se MLS goalkeeper Lalchhanchhuaha'n a dan sak.

IFL club-in hun ṭha an bawhpelh an tuar a, Aizawl FC aṭanga MLS zawmtu Felix Lalruatsanga a rawn inlar ve thung. Minute 68-naah Serchhip tlangval hian vei lam aṭangin a kawh zetin a volley lut - a club hlui an nih avangin a goal khung a lawm duh lo.

Injury time-ah Tuithiang midfielder Hmangaihkima a rawn inlar a, MLS midfielder hian box pawn aṭangin a ke vei lamin goal-ah ṭha zetin a khung - goal ropui bik a ni.

Hmangaihkima goal hi chakna goal ni tur khawpa mawi ni mah se Aizawl FC-in club lian zia an chhuah a, an tlawm duh lo. Hun pek belh minute riatnaah Mission Veng tlangval Roa'n Aizawl FC tan siphurh sutna goal a tauh lut a, 1-1 in inkhel a tawp.