Chelsea-in Hendo leh Welbeck an rim

Xabi Alonso enkawlna hnuaiah Chelsea-in player naupang rual ngawt kawl lo a, tawnhriat nei ṭha player-te nena khelhtir an tum a, thuthar berah chuan Brentford midfielder Jordan Henderson leh Brighton & Hove Albion striker Danny Welbeck an dawr mek.

Kum 36 mi Hendo hian Brentford-ah kum khat khel turin contract a la nei a, mahse, Bees hian free transfer-a chhuahtir an phal dawn nia sawi a ni a, kum 35 mi Welbeck pawh lakchhuah harsa lo tura ngaih a ni.

Chelsea neitu zinga mi Behdad Eghbali chuan April thla khan, "Kum naupang lam hawia player kan lakluh ṭhin chu her danglam hret a ngai a ni," tiin a lo sawi tawh a, tun nipuiah Alonso hoin an bawhzui nghal.

Liverpool captain hlui Jordan Henderson hian Reds tan nomawi chawi theih ang zawng zawng a chawi vek a, kum 2023 khan a chhuahsan. Saudi Pro League club Al Ettifaq, Ajax leh Brentford tan Reds a chhuahsan hnuah a khel.

Season hmasa khan Brentford hi zawmin, inelna hrang hrangah match 34 a khelhsak a, goal khat khungin, assist vawi thum a nei bawk. Hendo hi a tawnhriat piah lamah, hruaitu ṭha a nihna chu a larpui a ni a, Blues hian an squad naupang taka hruaitu turin an mamawh niin a lang.

Manchester United aṭanga a career ṭantu Welbeck hian March thla khan Brighton-ah hian kum khat dang khel turin contract a ziak zo chauh a, mahse, tunah Blues an lo lang - amah pawh hian chhuah a hnial lo niin an sawi.

Welbeck hian season hman zawh takah khan Brighton tan inelna hrang hrangah match 40 khelin goal 14 a khungsak a, assist vawi hnih a nei tel bawk - Joao Pedro thachhang dawltu ṭangkai tak a ni thei ang.

Hetihlai hian Chelsea hian tlarhma player-ah Liam Delap, Emmanuel Emegha, Marc Guiu leh Nicolas Jackson te chu an nei sa bawk a, a ṭhen chhuah an phal - Guiu hi loan emaw a ngheta chhuahtir emaw an hnial lo ve ve a, a manah pound maktaduai 25 an chhiar.

Bayern Munich-a loan hun hmang zo hlim Jackson hi Aston Villa chuan an ngaihven a, Delap hian Alonso hnuaia hmun chang tura beih a duh nia sawi a ni a, Emegha hi chu cham chiang tura ngaih a ni.

Blues hian senior player an rim avangin player naupang an melh lo tihna a ni lo. Villa aṭangin Morgan Rogers chu £117mtd-in an la a, July khan full back Marco Palestra chu £48mtd thlenga a man sang chho thei turin Atalanta aṭangin an la a, Crystal Palace aṭangin Maxence Lacroix an la hnai bawk.

Blues hian nimin khan pre-season tour-a an match hmasa ber khelin, Sydney khawpuiah Australian club Western Sydney Wanderers chu 6-4 in an hneh a, he inkhelah hian João Pedro chuan hattrick siamin, Blues tan Dastan Satpayev, Dário Essugo leh Jamie Gittens-ten goal khat ṭheuh an khung bawk.