Ramthar Vengin Kanan an lehthal

Ramthar Veng FC-in MPL club an nih hnua an match hmasa berah hnehna an chang. Nimin khan I Day Football-ah Ramthar Veng hian Kanan FC an hmachhawn a, 2-1 in an chak.

RG Stadium-a inkhelah Kanan FC-in captain atan ISL player Freddy Lallawmawma an hmang a, bul pawh a ṭan ṭha. Minute 18-na lekah Malsawmzela'n (Valpuia) ball ṭha hmuh chu goal-ah a chantir a, Kananin hma an hruai.

Mahse, minute nga hnu lekah Ramtharin siphurh an sut a, Kanan tlarhnung a phui lo. Ramthar hian corner kick an hmang ṭangkai a, Lalrinchhana'n chep tak aṭangin a khung.

Team pahnih an inhnehtawk a, Kananin an fimkhur tawk loh an tuar. Lalremruata'n (Bata) a tawp thlengin a bei hram hram a, Kanan player ball chan lai chu goal lamah pet pheiin Lalawmpuia'n minute 75-naah goal ruakah a khung. Ramthar Veng 2-1 in an chak

Ramthar Veng hian July 29, Nilaini tlai dar 1:30 hian Reliance Foundation Young Champs (RFYC) academy an hmachhawn dawn a, coach HC Zarzoliana hote hian point an hmuh hrim chuan quarterfinal an lut ang.