Indian Grand Prix awm leh mai thei

Ministry of Youth Affairs and Sports chuan Federation of Motor Sports Clubs of India (FMSCI) chu National Sports Federation (NSF) atan a pawm lailawk a, India ramah Formula 1 intlansiak a awmna kawng a inhawng zau hle.

Chennai-a inkulh FMSCI hian NSF-a telna tur dilna an thehlut a, thla khat chuang a liam hnuah pawmna hi an dawng. Ministry of Youth Affairs and Sports chuan FMSCI hnenah an pawm lailawk tih a nemnghet a, hetihrual hian FMSCI dan chu National Sports Governance Act, 2025 thuchhuah nen inang tura siam rem turin a chah tel bawk.

Sports Ministry, "Federation of Motor Sports Clubs of India (FMSCI) in National Sports Federation (NSF) a nihna atana pawm lailawk a dilna chu ngaihtuah a ni a, he lehkha chhuah ni aṭang hian FMSCI chu NSF atan pawmna pek lailawk tura thutlukna siam a ni," tiin thuchhuah an siam.

FMSCI hi sum leh pai, rorelna, anti-doping kalphungte a zawm lo a nih emaw, inbumna a awm a nih chuan he pawmna hi sut leh theih a nih thu an tarlang bawk. Mahse he thutlukna hian 2028 a Indian Grand Prix nei leh thei tura hmalakna a tihchak theih beiseitu an tam phah sawt a, Sawrkar leh India rama motorsport thuneitu sang ber ten thawh dunna ṭha zawk an neih theihna tura ruahmanna pawimawh tak a tling a ni.

Sports Ministry leh FMSCI te hi F1 rawn kir leh dan tur kawnga ruahmanna siam chungchangah an thawk dun a, kawng hrang hrangin hma pawh an la nasa. Sports Minister Mansukh Mandaviya phei chuan India rama motorsport intihsiakna lian ber berte an thlen theih dan tur zir chiang turin 'Task Force' bik pawh a lo din tawh a ni.

Mandaviya pawhin kum 13 hnua India-ah F1 a awm leh theih nan hma an lak thu a lo sawi tawh a, 2027 hma ngeia nei leh thei tura ṭan an lak thu a sawi. Hei bakah hian kum 55 mi Mandaviya chuan India ramah MotoGP thleng thei turin ruahmanna an siam mek thu a lo sawi tawh bawk.

Sports minister chuan, "Kum 13 hnua F1 kan thlen leh theihna turin kan bei mek a, intlansiakna hmun tur siam mek a ni a, tun aṭanga thla ruk chhungin kan zawh hman kan beisei a, 2027-ah chuan khawvel intlansiakna ropui hi kan rama tlantir leh ngei hi ka tum ber a ni," a ti.

Indian Grand Prix hi kum 2011 aṭanga 2013 thleng khan Buddh International Circuit, Uttar Pradesh-ah neih a lo ni tawh a, Red Bull driver Sebastian Vettel chuan vawi thum an intlansiakah hnehna a chang vek. 2013 hnuah sum senso a san vang leh chhiah a tam avangin tihtawp a ni a, tun thlengin an la chhunzawm leh lo.

Buddh International Circuit (BIC) hi India rama khawvel huap motorsport thleng hmasa ber a ni a, kum 2011 khan F1 Indian Grand Prix chu a thleng. He track hian driver te fak a lo hlawh hle.