McGregor-a'n 2027-a kir leh inbeisei

Irish fighter Conor McGregor chuan a khup hliam chu an enkawl mek thu a sawi a, nakkumah lo let leh a, a rang thei ang bera fight neih leh theih a inbeisei thu a sawi bawk.

Kum 38 mi McGregor hi kum hnih a chawlh hnuah Max Holloway hmachhawn turin a lo kir leh a, McGregor a inlan leh dawn tih an hriatin mipui an phur a, tu pawh hmachhawn dawn se a ṭawngkam leh a cheziain boruak a tihnung ṭhin avangin an hmu châk.

Press conference-ah pawh McGregor chuan, "Tun ṭumah chuan ramsa kawlh, danglam leh ṭha zawk a lo kir tawh dawn a, a kut hmawr pawhin min khawih hman dawn lo hrim hrim. A thiamna hi a hniam hle a, ka dah sang ngai lo hrim hrim," a ti a, Holloway a tham lo hle. Inkhelh hma hauh aṭangin boruak a sang tawh.

July 12, Pathianni zingah fighter pahnihte hi an inhmachhawn a, an ṭan chiah tihah McGregor chuan Holloway tlawh tumin zuang chungin a kei vei lam a khai chhuak a, a ṭum lehna lamah a khup tinain a tlu zui a, a inhliam tih a la hriat loh avangin Holloway pawhin a hnek nghal mawlh mawlh.

McGregor chu ding chhuak leh mah se ding nghet zo tawh lo a, a ke pen zawng ringawt pawhin a khup ding lamah na a tawrh avangin chhunzawm zel chi a ni lo a, referee-in titawpin minute khat leh second kuana lekah American fighter Holloway chu TKO hmangin a chak zawk.

'The Notorious' tih hiala hming lem an pek hi a vanduai takzet a, Hollowat nen tho an inhmachhawn hmasa khan hetiang deuh chiah hian a khup a lo tina tawh. McGregor chuan, "Ka inhliam hmasak zawk khan thla kaw chhung kir leh turin ka bei a, tunah chuan thiamna a san tawh bawk avangin nakkuma ka kir leh theih ka beisei," a ti.

Hetihlai hian UFC-a an hotupa Dana White chuan McGregor thusawi a thlawp lo a, hun khawhralna mai a nih thu a sawi ve thung. Kum 54 mi White chuan, "A khup zai a ngai dawn a, chumi hnuah therapy a lak leh ngei a ngai bawk ang.

Heng zawng zawng hian hun a duh rei dawn avangin, doctor kan rawn hmasa zel ang a, chumi hnuah octagon chhung a luh leh theih hun tur chu kan sawi leh zawk turah ka ngai," a ti.

McGregor hi tun hnaiah a vanduai a kaltluang a, Holloway nen an intawn hmaa a hmachhawn hnuhnung ber Dustin Poirier lakah a ke ruh a lo titliak tawh. A kum tam ve deuh tawh avangin a lo kir leh hunah pawh fight a hmachhawn hnem a rinawm tawh loh.