Sharmila Dhankar-in gold hlawh chhuak

Commonwealth Games neih mekah India-in gold a lak belh leh ta a, Sharmila Dhankar chuan Thawhṭanni khan hmeichhe shot put F57 category-ah, ke lam chak lo emaw harsatna nei te tana siamah metre 9.81 vawmin khumtu a nei lo a, India tan gold medal a hlawhchhuak.

Kum 39 mi Sharmila hi Haryana-a Chitrauli khua aṭanga seilian a ni a, kum hnih mi lek a nih laiin polio natna a kai a, hei hian a ke vei lamah harsatna siamin a chak loh phah hlen hial.

Sharmila hian a nunah buaina a tawk nasa a, "Ka nu kha mitdel a ni a, ka pa chu kut hnathawk ve mai a ni. Kan rethei ṭhin em em a, nun hi a awlsam ngai lo," tiin a sawi.

A harsatna hi sum leh pai mai a ni lo a - kum 19 a nihin pasal a nei a, kum tam tak chhung chu a pasal hian kutthlakin a tihduhdah thei hle. A fanu pahnih - Anju (kum 15) leh Lakshmi (kum 13) te nen a nu leh pate in lamah an kir leh hial.

Kum 2018 khan Ajit Singh nen innei lehin, a pasal pahnihna Ajit erawhin Sharmila hi engtik lai pawhin a thlawp ṭhin a, a pasal fuihnain 2020 khan kum 34 mi niin para-sports a luhchilh ṭan.

Coach Tek Chand leh Devendra te hnuaiah inzirin, kum 2021 khan a vawikhatna atan Para National Championships-ah gold medal a la. F57 category-ah hian metre 7.40 laia thui vawmin national record thar pawh a lo siam tawh. Sharmila hi inelna neih mekah India tana Mirabai Chanu dawta gold la leh thei hmasa ber a ni.