Infantino-a'n sawiseltute a chhang let

FIFA president Gianni Infantino chuan World Cup-a amah sawiseltute chu thudik tawk lo thehdarhah puhin a chhanglet a, hemi rual hian World Cup chu inpumkhatna leh intluktlanna tilangtu hlawhtling tak a ni tiin a chhan a ni.

Kum 56 mi Infantino chuan, "Huatna leh sawiselna chauha in rilru a khah tlat avangin engmah in hmu thiam ṭhin lo a ni. Râl lehlam leh screen phen aṭanga huatna leh dawt inthehdarh lai khan, FIFA chuan khawvela ennawm ropui ber chhuah tur hian theihtawp kan chhuah ve thung.

Chutihrualin tharum thawhna leh buaina engmah a awm lo a, World Cup avanga hlimna leh lawmna tam tak kan nei thei hi kan lawm em em a ni," a ti.

World Cup-ah khan thil thleng ṭhenkhat avangin FIFA hian sawisel a tawk nasa a, hemi avang hian nakkuma president inthlan atan Infantino dinhmun a nghing nia sawi a tam hle.

Ram ṭhenkhat fans leh official te chu US visa pekchhuah an ni lo a, Somalia referee Omar Artan chu visa nei mah se US-ah luh phallosak a ni a, Iran team leh an staff te pawh ram pahnih inbeihna avangin Mexico-ah thlentir an ni.

Heng bakah hian USA striker Folarin Balogun-a red card hremna hlihsak te, hydration break leh final halftime show rei lutuk te chu Infantino beih nana an hman ber a ni.

La Liga president Javier Tebas phei chuan kar hmasa khan FIFA chu a chhungril aṭanga a dik tawk loh thu a sawi a, inthlan leh hunah Infantino chu inhnukdawk tura a duh thu a sawi.

November 18, 2026 thleng president atana ding turten an hming an pe lut thei a, Infantino hian sawiseltu ngah hle mah se tun thlengin amah paihthlak tuma hming pe lut an la awm lo.