Chicharito a la inkhel dawn

Mexican striker Javier Hernandez chuan USL Championship club Atletico Dallas chu a zawm a, kum thum daih contract ziakin 2027-a inelna an ṭan aṭangin a khel dawn.

Kum 38 mi Chicharito hian season hmasa khan an ram club, a career bul ṭanna Guadalajara tan a khel a, hliam vangin match sarih chiah a inlan thei a, goal khat a khung. A kum a tam ve deuh tawh avangin a chawlh mai a rinawm hman a, mahse USA lamah a insawn leh dawn ta.

Dallas hi USA-a an league sang ber dawttu USL club an ni a, Major League Soccer (MLS) hnuai chiah an ni. Chicharito hi LA Galaxy tan a lo khelh tawh avangin America-ah a mikhual dawn lo.

Manchester United striker hlui chuan, "Dallas khawpui hian football an tuina bakah, a chhunga cheng mipuite ṭhatna leh a nawmna tilang turin club ṭha tak an mamawh. He club hi nomawi chawi theih ang ang chawipui ka duh a, infiammi naupang zawkte tana entawntlak nih ka duh a ni.

He lai hmunah hian ka career tawp lam hmang satliah turin ka lo kal lo a, Dallas-a football-in hma a sawn theihna turin ṭan ka la dawn, club ṭantute zawng zawng tan ṭan tlak kan nih zia hmuhtir ka tum dawn," a ti.

Atletico Dallas sporting director Brian Corcoran chuan, "Chicharito hi Champions League hial pawh lo khel tawh a ni a, khelmual bakah locker room thlengin a tawnhriat ngahna hi kan chhawr theih ka beisei. A kum tam ve deuh tawh mah se a professional em em a, club hian lak tur dik tak kan la lutah ka ngai," tiin a fak.

Real Madrid tan pawha khel tawh Hernandez hi Mexico tan World Cup-ah ṭum thum a inlan tawh a, ram tan match 109-ah goal 52 khungin ani aia khung hnem an awm lo. Mahse kum 2019 aṭang khan ram tan a la inlan leh lo.

World Cup khelh zawh takah khan Chicharito hi broadcast team tan analyst angin a awm ve a, ram tan koh ni lo mah se World Cup-ah a inkhel lo zawngin a ṭangkai thung.