Juventus-in Zirkzee an duh

Manchester United forward Joshua Zirkzee chu Italian club Juventus chuan an duh a, season khat chhung loan-a lak bakah, lei zui thei tura inremna neihpui an duh a, Dutch forward dinhmun a chiang lo hle.

Juve hi an striker Dusan Vlahovic chu a contract a zawh rualin a chhuak tawh a, Jonathan David la awm mah se season hmasaah goal ruk chauh a khung theih avangin an duh khawp lo.

Zirkzee hian Red Devils tan match 75 aṭangin goal kua chauh a la khung a, mahse Serie A-ah tawnhriat a lo nei tawh a, Juventus chuan a khelh dan nen an inmil dawna an hriat avangin an duh. Italian club lian hian kum 25 mi Zirkzee loan-a an lak hnuah pound maktaduai 30 a lei an inhuam.

Tun dinhmunah United hian tlarhmaa khel thei Benjamin Sesko, Matheus Cunha leh Bryan Mbeumo te an nei a, anni bakah hian Marcus Rashford a lo kir dawn bawk a, a tan hmun chan a harsa tawh dawn.

Chutihrualin Manchester United hi season thara Champions League khel tur an ni a, match khelh tur an ngah dawn avangin squad chhah a pawimawh dawn a, Zirkzee hi tlawm taka chhuahtir ai chuan kawl chhunzawm an thlang zawk thei bawk.

Zirkzee hi July 2024 khan khatih laia United coach Erik ten Hag-a'n £36.5 mtd in Bologna aṭangin a la lut a, mahse beisei a pha lo zui. Season hmasa khan inelna hrang hrangah match 26 khelin goal hnih leh assist pakhat chauh a nei a, match ngaah chiah bul a ṭan bawk.

Juve hian Zirkzee bakah Paris St-Germain forward Randal Kolo Muani chu an duh bawk a, mahse season hmasaa Tottenham Hotspur tana khel hi PSG-in a man atan an chhiar zat chu an ngam loh avangin an kiansan.

Season hmasa khan Juventus hi parukna ni chungin season an khar a, pahnihna Como chu point hnih chauha an phâk loh avangin Europa League an khelh a ngai. Juve hian an ropuina rama kir leh tumin theih tawp an chhuah mek.