F 1-a vawi 6 champion thei Lewis Hamilton

Car intlansiakna sang ber Formula 1 inelnaah Lewis Hamilton chu a vawi ruk nan a champion ta a, driver ropui bera chhal Michael Schumacher-a champion zat (7 titles) nih rual turin vawi khat champion chiah a mamawh tawh.

Pathianni zan, keini lama nimin zing khan Circuit of the Americas-ah United States Grand Prix tlan a ni. Mercedes driver Hamilton hi pahnihnaah a thleng, a hmaah a teammate Valtteri Bottas a thleng thung.

Tun season intlansiak vawi 19 an hmachhawn tawhah Hamilton hian point 389 zet a hmu tawh a, amah hnaih bertu Bottas-a'n point 314 chauh a la neih avangin intlansiak hmabak pahnih la awmah Britain tlangval hi lehpelh theih a ni tawh lo.

US Grand Prix an tlan hmain Hamilton hian, "Champion ringawt ka rilruah a awm lo, a pawimawh chu inelna neih apianga hnehna chan tum a ni bawk," tiin a sawi a, inelna tak an neih hnuah pawh point hmu satliah ni loin huaisen takin hnehna chan tumin a bei.

Hamilton-a'n inelna tlan ṭha viau mah se a teammate Bottas a tlanpel thei lo a, a hnunga awm driver hlauhawm Max Verstappen leh Charles Leclerc te erawh a dang thei - an elpui Ferrari leh Red Bull te chungah an leng tihna a ni nghal.

World champion vawi ruk ni tawh Hamilton chuan, "Kum sarih mi vel ka nih lai khan ka pa chuan beidawng ngai lo turin min fuih a, ka nun kawng hruaitu pawimawh tak a ni. Tun ṭumah pawh khan hnehna chan ngei tumin ka bei, mahse ka motor ke (tyre) hman khan a tlin tawkin ka tlan," a ti. 

Pakhatna ni lo mah se champion turin a dinhmun a ṭha tawk tho. Qualifying a tlan ṭhat loh avangin pangana aṭangin a tlan ṭan chauh a, Ferrari driver Leclerc leh Sebastian Vettel te tlan pelin inelna hmuhnawm tak a chhawp chhuak.

Lewis Hamilton hi kum 34 mi a ni a, a taksa a la fit ṭha - beisei dan chuan season tharah pawh driver ṭha berte zinga mi a ni leh ang. Tun dinhmunah world title paruk ngawt a kawl tawh, vawi nga champion Juan Manuel Fangio nen record inṭawm (5 titles) an neih chu a kalsan.

Tuna a thlen chinah pawh Hamilton hi F1 driver ropui ber pakhat chu a ni tawh, 2017 khan pole position chan hnem lamah Schumacher a lo khum tawh. Hnehna chan hnem lamah erawh German legend Schumacher (91 wins) hi a la hlat deuh, vawi 83 a chak tawh.

Season kal laiah Brazilian Grand Prix leh Abu Dhabi Grand Prix te an la tlan leh dawn, chak hnem record siam a duh a nih chuan champion tawh mah se inelna pahnih hi a tan a la pawimawh dawn hle tihna a ni.F 1-a  vawi 6 champion thei Lewis Hamilton