RFYC leh Lushai Corner inlan hun

I Day Football-ah vawiin hian state pawn aṭanga chahluh Reliance Foundation Young Champs (RFYC) academy an inlan dawn a, Mumbai-a innghat academy hian chawhma dar 11:00-ah Ramthar Veng FC an hmachhawn ang. Chawhnu dar 1:30-ah coach B. Malsawmzuala (Sawmtea) enkawl Lushai Corner FA leh Lawngtlai club MLS FC te an inkhel ang.

MPL kai thar Ramthar Veng hian match hmasa berah Kanan FC an hneh avangin an phur lai tak a ni a, an khingpui tur RYFC hi player ṭha rual, awmze neia training ni mah se kum lamah an la naupang thung. Inkhel hi en châkawm a ni a, Zonet Zawlbuk leh YouTube channel (member @Rs. 299) aṭangin a en theih.

MLS hi match hmasa berah Aizawl FC lakah chak thei dinhmunah an ding a, chutihrualin Lalrozama Fanai enkawl Lawngtlai club tan IFL club laka point khat hlawhchhuah a chhe lo. Mahse, First Division club Lushai Corner FA hi chetsual theihna an ni. Lushai Corner hian Hmingthanmawia Ralte (Valpuia), Lalmuanawma (Munez), Sairuatkima, Lalfelkima, Zothanpuia (Puipuia), Ayush Chhetri, Joseph Lalvenhima, K. Lalrinfela (Mafela) leh C. Lalhriatpuia te an ziaklut.