Group A pakhatna Dinthar FC

I Day Football-ah Mizoram club hlun ber zinga mi Dinthar FC-in bul an ṭan ṭha a, an hmelma Chanmari FC an hneh hnuah nimin khan Bawngkawn FC 4-2 in an hneh. Maimawms hian match hnihah point ruk hmuin group A pakhatna nichungin quarterfinal an lut.

RG Stadium-a inkhelah Bawngkawnin bul an ṭan ṭha zawk a, minute thumna lekah Lalmalsawma'n Dinthar defender te paltlangin goal hmahruai a khung. East Lungdar tlangval Malsawma hi season liam ta khan Chawnpuiah a khel a, MPL club-in an melh zui a rinawm.

Maimawms coach Laldampuia'n halftime a hmang ṭha a, second half-ah minute 10 chhung lekin goal thum an khung. Silvana R Lalruatkima'n penalty a hlawh chhuak a, Jerry Lalchhanchhuaha'n minute 50-naah a khung. Season liam ta MPL-ah Jerry hi inhliam lo se Dinthar hian semifinal an luh phak hial a rinawm.

Minute thum hnuah Lalawmpuia Sailo ball fing chu Silvana'n a khung a, minute ruk hnuah Jerry bawkin a khung. Goal thumna pawh hi Silvana thawhrah a ni a, Jerry-a'n goal ruakah a khung.

Darkar khat a ral meuh chuan chak tur a chiang chho nghal. Bawngkawnin minute 65-naah Lalmalsawma hmangin si phurh an sut ṭhen a, H. Lalmuankima hnathawh ṭhat rah a ni.

Mahse, minute 78-naah Bawngkawn player Lalhruaidika'n an lamah a tihluh avangin thawhchhuah ngaihna a awm ta lo. Dinthar 4-2 in an chak.

Dinthar hian semifinal-ah group D pahnihna an hmachhawn dawn. Group D-ah hian Kanan FC, Ramthar Veng leh RFYC te an awm a, tun dinhmunah an hmachhawn tur hriatthiam a la har deuh.