Bawngkawnin Dinliana an tawrhpui

I Day Football-ah Bawngkawn FC-in beiseina sang tak nei mah se chhiattawhna avangin an player pawimawh Laldinliana an chhawr thei lo. ISL player Dinliana tel loin Bawngkawnin an match hmasa berah Dinthar FC an hmachhawn a, 4-2 in an chak lo.

Ricky Lallawmawma enkawlna hnuaia khel Bawngkawn hian training hnuhnung ber pawh kim takin an nei thei a, mah se Thawhlehni zan khan an player pawimawh Dinliana pa R. Lalremruata chu lirthei chetsualna avangin a thi.

Bawngkawnin Dinliana an chhawr thei lo a, inkhel turin player-te rilru a inpeih tawk lo. ADFA First Division club hian Dinliana te chhungkaw tawrhna an hriatpui a, inkhelh hmain Dinliana pa R. Lalremruata thlalak chuanna banner an phochhuah bakah armband dum an hreng bawk.