Italy hotupa thar Ranieri

Italian Football Federation (FIGC) president Giovanni Malagò-a'n coach atana Roberto Mancini an lakluh thu a puang a, Mancini an lakluh rual hian Claudio Ranieri chu FIGC Technical Director thar tura ruat a ni bawk.

Mancini lakluh vanga lungawi lo, technical director ni lai Paolo Maldini a ban takah chuan Italy-in a thlaktu tur an zawn tel a ṭul a, tawnhriat nei ṭha leh football khawvel huap pawha zah kai pha Ranieri an la lut ta.

Kum 2016-a ropui taka Premier League-a Leicester City champion puitu Ranieri hian May 2024 khan Cagliari chhuahsanin, coaching a chawlhsan thu a puang - Cagliari hi Serie B aṭangin Serie A a kaipui a, Serie A-ah hian inhamtanpui chungin a chhuahsan.

Mahse, November 2024 khan a club hlui AS Roma ngenna chu pawmin, club enkawl turin a kir leh a, a enkawl tirha league match 12-a vawi thum chiah chak thei team hi match 19 zet a zawna tlawm loin a kalpui a, pangana ni chungin season an khar.

Roma a puih hnuah club Special Adviser atan ruat zui a ni a, hetihlai hian Luciano Spalletti chuan Italy Coach hna a bansan lai niin, Italy coach ni tura sawmna chu a hnar zui.

Mahse, April 2026 khan Roma-a a hna pawh a chawlhsan a, tunah chuan coach ni tura an sawmna a lo hnar tawh Italy team-ah Technical Director a ni dawn ta a, Mancini nen an thawhdun dawn avangin beiseina a sang ang.