Bayern-in manager Kovac an ban

Bayern Munich chuan an manager Niko Kovac an ban. Inrinni zana Eintracht Frankfurt an hneh loh hnuah German champion hian Croatian manager nena an thawh dunna hi an titawp.

Kovac kaihhruaina hnuaiah Bayern hian beisei an phak lo, tun dinhmunah Bundesliga table-ah palina niin hmahruaitu Borussia Monchengladbach lakah point liin an hniam zawk. Kum 48 mi Kovac kaihhruaina hnuaiah Bayern hian match 65 an khelh aṭangin vawi 45 hnehna an chang a, tun ṭuma 5-1 ngawta an tlawmna hi tun hnai season 10 chhunga league match bika an chak loh nasat ber ṭum a ni.

Season hmasa khan Kovac-a'n Bayern hi league bakah German Cup-ah a champion pui, inelna lian Champions League-ah erawh Liverpool an ngam lo. Tun season UCL-ah erawh group B hmahruaitu an ni mek. Bayern chief executive officer Karl-Heinz Rummenigge chuan, "Tun hnaia kan khelh dan leh result aṭang hian team chhungah eng emaw danglamna kan mamawh a ni. Ngun taka kan ngaihtuah hnuah Niko hna kan titawp, club tana a hnathawh avangin a chungah lawmthu kan sawi," a ti.

Assistant coach Hansi Flick chuan Bayern hi a enkawl lailawk dawn, Nilaini zana Olympiakos an hmachhawn tur leh kar tawpa an elpui Borussia Dortmund nen an inkhelh hunah Flick enkawlna hnuaiah an khel ang.