Manipur club tan Police an ṭha hret

I Day Football-ah Mizoram Police-in quarterfinal lut turin nimin khan Manipur club Ganggam SC chu 2-0 in an hneh. Police tan hian C. Laldinmawia leh Lalbiaktluanga ten goal an khung.

RG Stadium-a inkhelah Police an chungnung hret a, minute 32-naah freekick aṭangin Dindina'n a khung. Bethlehem Vengthlang tlangval hian tawnhriat ṭha rual Police ho karah freekick a pet pha a, keeper tibuai tura ding F. Lallawmkima a ṭangkai tel bawk.

Minute 60-naah Police-in an phu angin an khung belh a, Tluanga'n a lu hmangin tauh lut nghal lo mah se a per chu goal-ah a khung leh ta tho. Keiṭum tlangval Tluanga hi Police Academy chhuak a ni a, season liam ta pawh khan Police team tan a ṭangkai hle.

Police hi an match hmasa berah Saikhamakawn nen 1-1 in an inhnehtawk a, Manipur club laka hnehna an chan avangin point li hmuin quarterfinal an lut. Group B match hnuhnung berah Saikhamakawn leh Ganggam te an inkhel dawn a, hemi result a zir hian Police hi an group-ah pakhatna an ni thei a, pahnihna an ni thei bawk.