Record siamtu Gulveer tan silver

Commonwealth Games khelh mekah India-in medal a lak belh ve zel a, Thawhlehni zan khan Gulveer Singh chu 10,000 metres intlansiakah pahnihna a ni a, silver medal a lak bakah metre 10,000 intlansiakah India tana medal hlawh chhuak hmasa ber a ni.

Kum 28 mi Gulveer hi Sirsa, Uttar Pradesh-ah piangin lo nei chhungkua aṭanga seilian a ni a, an khua hi sipai ngaisang an nih avangin ani pawh sipai nih chu a tum ber a ni ṭhin a, athletics lam a luhchilh a inring ngai lo. Amah bakah an khaw mite ngei chuan Commonwealth leh Asian Games an hriat ngai loh thu a lo sawi tawh.

A naupan lai aṭanga a thil tum chu kum 2018 khan puitlinin, Indian Army-ah sports quota hmanga lutin, Indian Army hnuaia Grenadiers regiment-ah a awm. Junior Commissioned Officer (JCO) rank thlengin a kaisang ta hial.

Gulveer chuan, "Sipai ka ṭan hnuah chauh intlansiak hi ka hmelhriat ṭan a, Army Sports Institute-ah ka lut hnuah Sports Authority of India hnuaiah national camp ka zawm zui leh. Hemi hnu hian infiamna chungchang leh a kalhmang ka hre chho ta zel a ni," a ti.

Sipai a ṭan hnuah Gulveer-a hi Arunachal Pradesh-ah te dah a ni a, tlang ramah ramria patrol leh venhimna hnate an thawh avangin hei hian a taksa a puih nasat thu a sawi bawk.

Gulveer Singh-a tan kailawn pawimawh inṭan tak takna chu 2022-ah, Calicut-a Federation Cup kha a ni a, mipa 10,000m-ah bronze medal lain a vawi khat nan podium a lawn. He a hlawhtlinna avang hian international tournament hrang hrangah a tan zau takin kawng a inhawng zui.

Inelna kal mekah India hian Gold pahnih, Silver pasarih leh Bronze pathum lai medal 12 an hlawh chhuak ve tawh a, medal la dawng thei infiammi 10 chuang an la awm avangin a la pun leh ngei a rinawm.