Warriors-in Green contract ziahpui

Golden State Warriors chuan LeBron James an lak theih loh hnuah an veteran player, Draymond Green chu kum khat atan dollar maktaduai 28 hlawh turin contract an sign pui leh a, a contract zo tawh mah se Warriors-ah bawk a khel leh dawn.

Kum 36 mi Green hian 2012 Warriors-in draft-a an thlan hnu khan club dang tan a la khel lo a, thla hmasa khan a contract zo tawh mah se contract thar zawrh a ni a, mahse Warriors-in James lakluh an tum avangin hlawh chungchangah buaina a awm theih dawn avangin a hnar.

Club-in James an lak theih nan Green-a'n chhuah mai a hnial lo a, mahse kum 41 mi James-a'n Philadelphia 76ers a zawm leh tak avangin Warriors-in midang dawr loin Green bawk hi contract an ziahpui.

Green hi Stephen Curry te nen 2015, 2017, 2018 leh 2022-a NBA title an lak ṭum khan player pawimawh a nih phâk a, a kum tam ve deuhin point score tam tawh lo mah se, player naupang zawk kaihruaitu pawimawh tak leh defensive player ṭha tak a la ni.

Podcast pakhatah Green hian LeBron nen hun an hman thu leh Warriors zawm tura a sawm thu a lo sawi tawh a, James a luh theihna tur a nih chuan amah zawk pawh hlawh tlem zawk lak emaw chhuah hial pawh hreh lo khawpin club a hmangaih.

Hetihlai hian Curry chu Miami Heat-in lakluh an tum niin thuthang a awm mek a, kum 38 mi Curry pawh hi Green ang bawkin Warriors tan chiah a la khel a, a khel zel a nih chuan kum hnih atan $137 mtd man hu contract ziak thei dinhmunah a ding dawn.