Savinho dinhmun chiang lo zel

Manchester City winger Savinho chuan Tottenham Hotspur lam pan duh mah se club-in chhuak turin kawng an la hawnsak lo a, Etihad Stadium-a Savinho dinhmun a chiang lo zel.

Kum 22 mi Savinho hi Spurs head coach Roberto De Zerbi duh zinga mi a ni a, nikum nipui lai pawh khan Spurs hian Savinho hi an lo rim tawh a, mahse City chuan an dilna an lo hnawlsak.

Brazil international hian July 2024 khan Troyes aṭangin pound maktaduai £30.8-in City hi a zawm a, beiseina sang tak nen Pep Guardiola-a'n a la lut. Spanish coach hnuaiah hmun chang mah se season hmasa aṭang khan a dinhmun a nghing ṭan.

Savinho hian season hmasa khan inelna hrang hrangah match 39 khelin goal nga leh assist pathum a nei a, mahse vawi 14 chiah inkhel bul a ṭan. Kumin January-a Antoine Semenyo-a'n City a zawm hnuah a inlan hnem tawk lo.

Nikum October khan Savinho hian kum hnih atan a contract a pawt sei a, a hmang zo a nih chuan 2031 thleng Etihad Stadium-ah a cham dawn avangin la chhuak turin sum thehchhuah hnem a ngai mai thei.

Mahse, Spurs hian tun nipuiah sum an hmang na takzet a, Sandro Tonali, Mateus Fernandes leh Jan Paul van Hecke te lakluh nan £245mtd an hmang tling tawh a, Brazilian winger hi an duh tak tak a nih chuan an hman belh hreh lo ang.

Hetihlai hian Jack Grealish chu City-ah a kir leh tawh dawn a, mahse English forward hi a la inhliam avangin a chawlh chen tur a la hriat loh. Citizens hian Arsenal lakah Premier League nomawi an chân a, lak let leh an tum a nih chuan squad chhah ṭhat a pawimawh dawn. Chuvangin Savinho hi man tlawm taka an chhuahtir mai a rinawm loh.

Enzo Maresca naute hian naktuk tlai dar 5:00-ah Inter Milan nen friendly match an khel dawn a, season thar inbuatsaih nana an match hmasa ber tur a ni. August 16, Pathianni zanah Arsenal nen Community Shield-ah an inhmachhawn dawn avangin Italian coach hian player naupang zawk a chhawr a beiseiawm.