Diaz-a'n Al Hilal zawm dawn lo

Bayern Munich chuan an winger Luis Diaz chu Al Hilal-in sum tam tham tak nen sawm mah se, a chhuah an phalsak loh bakah amah ngeiin Allianz Arena-a châm a duh avangin Saudi Pro League club a zawm dawn lo.

Al Hilal hian Colombian forward hi tun nipui transfer chhunga lak an tum a, a man atan euro maktaduai 70 zet thehchhuah an inhuam. A hlawh atan pawh kum khatah €22.5 mtd pek an inhuam avangin Diaz hi a chhuah mai a rinawm hman.

Mahse Diaz hian Bayern tana rinawm a thlang a, European top flight league khelh zela nomawi tam thei ang ber chawi a duh. Diaz hian nikum nipui lai khan Liverpool aṭangin Bavarians hi a zawm a, season hmasa khan inelna hrang hrangah match 51 khelin goal 26 leh assist 23 a nei nghal a, Bundesliga leh DFB Pokal-ah an champion nan a thawh hlawk hle.

Kum 29 mi Diaz bakah hian Michael Olise chu club liante chil tiputtu a ni a, Olise hian season a hman ṭhat bakah World Cup-ah France tlarhma tan a hmuhnawm takzet a, Real Madrid nen sawi zawm an ni mek.

Season liam ta khan Bayern hi treble champion thei dinhmunah an ding a, mahse Champions League-ah Paris St-Germain an hneh loh avangin an beiseina a thamral a, PSG hi an champion zui bawk. Diaz hian goal sarih khung mah se a champion pui zo lo.

Kuminah chuan treble beisei kher lo mah se UCL champion an tum nawn leh dawn a, chumi tur erawh chuan an theihtawpa an ṭan bakah an player ṭhate an chelh theih a pawimawh bawk ang.