Como-in ball head theih chin siam

Serie A club Como chuan an academy-ah naupangten ball an tauh (heading) vanga, an luah harsatna thleng thei thil laka an fihlim theih nan kalphung thar an duang a, practice leh game-ah ball tauh zat theih zat an bituk tawh dawn.

He dan thar hi Como chuan lu-a harsatna awm thei tihtlem nan leh player naupang, thluak ṭhang lai mekte tan a him zawkna tura duang an nih thu an sawi a, he thil hi tun hma aṭang tawh khan sawi a lo ni tawh ṭhin.

Como hian naupang kum 10 (U-10) hnuai lam chinte chu, training leh match pangngaiah ball tauh an phalsak tawh dawn lo a, throw-in leh corner te pawh leiah ball pass tawh turin an ruahman. Kum 11 (U-11) chinah ball tauh dan (heading technique) zirtir ṭan a ni ang a, mahse ball pangngai aiah rubber ball nem leh zang zawk an hmang dawn.

Under-12 player te erawh thla khatah vawi khat chauh ball tauh dan zirtir an ni ang a, anni pawhin rubber ball tho an hmang dawn a, mahse session khatah vawi nga aia tam tauh an remti dawn lo thung.

Season thara Champions League khel tur Como hian an academy, kum bithliah hrang hrang tana kaihhruaina tarchhuakin, coach te chuan ball tauh reng ngai lo tur ang berin training an kalpui ang a, ball puar leh ruh lutuk chu hman an remti dawn lo bawk. He inkaihhruaina hi season tluanin enfiah a ni bawk ang.

Como Board of Education-a member ni mek Raphael Varane chuan, "Football-ah hian ball tauh vanga harsatna chungchang hi vawi tam tak ka lo sawi tawh ṭhin a, naupang zawkte hi kan venhim a ngai. An hriselna dah pawimawh hmasak hi kan tihmakmawh a ni," a ti.

Kum 33 mi Varane hian 2024 khan ball a head nasat avangin harsatna a tawh bakah, player dangte chungah pawi a khawih dan a lo sawi chhuak tawh a, training-ah te ball tauh loh emaw bituk neih a duh thu a lo au chhuahpui tawh.