Chanmari Vs Electric Veng

Chanmari FC-in an ṭhenawm club Electric Veng an hneh loh aṭanga kar hnih pawh tling loah phuba lakna remchang an nei a, vawiin tlai dar 4:00 hian Lammualah tualchhung club ṭha pahnih hi an inhma-chhawn dawn.

Mizoram Premier League Season 8-ah round nga chauh khelh tur a awm tawh a, semifinal lut tur leh tla tur an inthliar ṭan. Chanmari leh Electric Veng hian point 14 ve ve an hmu a, MPL-ah head to head a nih avangin an inhnehtawk a nih chuan an intawn hmasak ṭuma chak Electric Veng hi an pahnih inkara buk rit zawk an ni ang.

Chanmari FC manager Lalhmangaiha Sailo (Angaiha) chuan, "Football-ah chuan chak loh hi thil theih a ni. Amaherawhchu Electric Veng bikah hi chuan Chanmari mipuiin tlawm an hreh. Kan intawn hmasaka kan chak loh pawh khan ṭawngkam kan dawng nasa a, pressure pawh min pe nasa khawp mai," tiin veng ṭhenawm laka tlawm a hrehawm thu a sawi.

Angaiha chuan sawi chhunzawmin, "Mizoram Police nen khan inhnehtawk ila, tunah chuan pahnihnaah kan awm ang. Mahse a tawp thlengin chak kan tum a, chu chu kan rilru put hmang a ni. Electric Veng nen pawh hian draw hi result chhia a ni lo ang, mah se keini chu chakah chauh kan lungawi dawn," tiin chak ngei an tum thu a sawi.

Chanmari manager hian heti taka chak a duh hi a mak lo. Kumin MFA Super Cup semifinal-ah Chanmari FC leh Electric Veng FC te 1-1 in an inhnehtawk a, penalty shootout-ah Chanmarians 5-3 in an chak. Coach Lalsangzuala Hmar chuan, "An hnuaiah kan awm reng lo ang," tiin inkhelh banah a sawi a, I Day Football-ah Electric Veng hian 3-1 in Chanmari hi an hneh let. MPL8-ah pawh Sanga hote hi 1-0 in an chak a, Chanmari hi an chak lo leh a nih chuan a zawna an vawi thum chak lohna tur a ni.

Electric Veng an hmachhawn hunah Chanmari FC-in hrem vanga match hnih khel thei lo striker Lalremruata an chhawr thei tawh dawn a, H. Lalmuankima pawhin bul a ṭan lo a nih pawhin squad-ah a awm thei tawh. Chanmari hi match hnih a zawna an chak tawh bawk avangin inrintawkna an ngah lai tak a ni.

Electric Veng erawh Chanmari an hneh hnuah Aizawl FC leh Mizoram Police te an hneh lo a, match hnih a zawna an chak loh avangin an talbuai lai tak a ni. Chutihrualin tuna an harsatna aṭanga hruai chhuak thei tur chu coach Sanga hi a ni a, Chanmari hmachhawn tur hian engtin nge player a rem ang tih hriat a châkawm hle.