James awmna Lakers an kal fawr
LeBron James chuan a zawna match hnih nan triple-double a nei a, American legend hian Los Angeles Lakers chu San Antonio Spurs lakah 103-96 a hnehna chanpuiin NBA regular season kal laiah a zawnin match nga hnehna an chang ta.
Nimin zing inkhelah James chu Lakers tana innghahna leh thiampuipa pangngai a ni a, Cleveland Cavaliers star hlui hian Spurs lakah 21 pts, 13 assists leh 11 rebounds a nei. Ani thlawp tur hian season chawlh laia lakluh Anthony Davis chuan point 25 neiin rebounds 11 a nei a, double-double a nei ve bawk.
Basketball-ah hian points, rebounds, assists, steals leh blocked shots te hi an ngai pawimawh a, heng panga zinga mi pahnihah hian 10 an neih tlin chuan double-double tih a ni a, pathum an neih chuan triple-double tih a ni thung.
Season bul ṭannaah Lakers hi Los Angeles Clippers lakah an tlawm a, a hnu lamah erawh match an khelh zawng zawngah hnehna an chang chho ta vek - Nilaini zing dar 6:30 hian Chicago Bulls nen an inkhel leh ang.
Nimin zing NBA Results
LA Lakers 103 - 96 San Antonio Spurs
Utah Jazz 94 - 105 LA Clippers
Chicago Bulls 95 - 108 Indiana Pacers
Houston Rockets 100 - 129 Miami Heat
Dallas Mavericks 131 - 111 Cleveland Cavaliers
Sacramento Kings 113 - 92 New York Knicks