A thiam zingah Barty chungnung ber

Women's Tennis Association (WTA) Tour Finals-ah Ashleigh Barty a chungnung ber. Pathianni zan final-ah world number 1 hian champion lai Elina Svitolina hnehin nomawi a chawi.

China khawpui Shenzhen-a inelna neihah Australian nula hian Svitolina hi 6-4, 6-3 in a hneh a, world number 1 ni chunga season a khar bakah tun inelna bik aṭang hian pound maktaduai 3.42 a dawng. Kum 23 mi Barty-i'n an intawn hnuhnung pangaah Svitolina hi a hneh miah lo, tun ṭum inkhel pawimawhah erawh a chungnung hle. A service vawi hnih hloh ve ve mah se a khingpui service hi vawi li ngawt a chhuhsak.

WTA Finals vawi khat a khelhnaa champion nghal Barty chuan, "Ka tan chuan season duhawm leh ngaihnawm tak a ni. A ṭha zual pariat inelna a champion nghal theih chu duh mah ila beisei aiin a thleng hma," a ti.