Everton 1-1 Tottenham
Pathianni zan Premier League inkhelah Everton leh Tottenham Hotspurs 1-1 in an inhnehtawk a, inkhel result aiin Andre Gomes hliam chu sawi hlawh zawk a ni.
Gomes hi hun tawp nan minute 11 chauh a awm tawh tihah Son Heung-min chuan a tlawh a, Gomes tlu hi Serge Aurier chuan lo tlawh fuh lehin a ngal rek a tliak. Mittui nen Son a hawihai a, Aurier chuan a hnaiah pawh en ngam loin mangang takin a ṭawngṭai. Gomes zawn chhuah a ni a, nimin khan Portuguese midfielder hi zai nghal a ni.
Gomes inhliam lai hian Everton hi 1-0 in an hnufual a, hun pek belhah Cenk Tosun chuan si phurh sutin 1-1 in an inhnehtawk. Gomes hrehawmna karah Everton-in lawmna tur an nei.
VAR buaina bawk chu
Goodison Park-a inkhelah VAR bawkin hmun laili a chang leh a, he dan thar hian hun engemaw chen chhung chu English football-ah titi a siam dawn niin a lang. Spurs tan Dele Alli chuan goal hmahruai a khung hnu lawkah penalty box-ah a kutin ball a khawih fuh niin a lang a, Everton-in penalty an beisei.
Mahse, VAR hmanga minute thum ennawn a nih hnuah pawh Merseyside club hi penalty pek an ni ta chuang lo a, Everton fans leh players an lawm lo hle. Everton manager Marco Silva chuan, "Thil thleng kha chiang takin ka hmu a, an thutlukna ngai bawk siam tura minute thum lai an mamawh kha ka hrethiam lo," a ti.
Hrehawm karah lawmna
Penalty pek loh vangin Everton fans an lungawi lo a, minute 79-naah a aia duhawm lo zawk thil a thleng. Gomes-a ball khalh phei chu hnung lam aṭanga umtu Son chuan a tlawh thlu a, a inhliam zui. Referee Martin Atkinson chuan yellow card a phawrh zet a, Gomes-a hliam rapthlakzia a hmuh hnuin South Korean forward Son hi a hnawt chhuak - Atkinson a talbuai ve deuh niin a lang a, hliam na viau mah se yellow card chauh phawrhna tur niin a lang.
Gomes lakchhuah a ni a, inkhel chhunzawm a ni. January hnua league away game-a chak la nei lo Spurs-in Alli goal khung chu hnehna an chanpui mai dawn niin a lang hman. Mahse, Everton vanneihna a her chhuak a, hun pek belh minute sarihnaah Tosun chuan si phurh a rawn sut - Goodison Park thawm a ṭha a, Everton fan-ten Gomes an hre reng.