Paris-ah Djokovic a thiam ber

Novak Djokovic chuan Denis Shapovalov hnehin Paris Masters-ah a champion a, mipa tennis ATP hnuaia inelnaah vawi 77 zet a champion-na chiah a ni nghal.

Pathianni zan final-ah Djokovic a chungnung hle, set hmasa zawkah 3-0 in hma a hruai thei a, set hnuhnungah pawh a service a hloh lo; nuamsa tak 6-3 6-4 in hnehna a chang. Nimina world ranking chhuak tharah chuan Djokovic hi Rafael Nadal-a'n number 1 nihna a chhuhsak. Serbian tlangval hi champion mah se, inelna a hmachhawn hnuhnung zawk Shanghai Masters-ah nomawi a hum thei lo.

Vienna leh Basel-ah a inlan lo bawk a, hei vang hian Djokovic-a'n a point neih sa 1600 a hloh. Paris Masters-ah Nadal-a'n semifinal a thleng ve leh thung a, hliam vangin inhnukdawk mah se a dinhmun a ṭhat zawk phah a ni.

November 10 aṭangin London khawpuiah ATP Finals khelh a ni leh dawn a, he huna an chet dan a zirin Nadal nge Djokovic zawk chu number 1 ni chunga season khar tur a chiang chauh ang.

Grand Slam vawi 19 champion tawh Nadal chu hliam vangin a chawlh a ngai rih a, O2 Arena-ah a inlan thei dawn em tih a la chiang lo. Nadal a inlan lo emaw, group match-ah hnehna a chang lo a nih chuan Djokovic tan a chung ber luah turin group match lama hnehna chan a tawk dawn.

Kum 32 mi Djokovic chuan, "London-ah hian ka match khelh zawng zawnga chak vek theihna kawng a awm, tun hma pawhin chutiang chuan ka lo ti tawh," tiin a zam lo hle, a thiam pariat inelnaah hian vawi nga ngawt a champion tawh a ni.