MMA professional fight hmachhawn tur PMS

Mizo ten MMA fighter kan neih ṭhat ber pawl PMS Dawngliana chuan MMA-ah professional fight a hmachhawn dawn a, Kawrtethawveng tlangval hian November 23 khian Hyderabad khawpuiah fight a nei ang. 

PMS-a hian middle east-a MMA promotion company lian ‘Brave Combat  Federation tan November 4 khan contract a ziak a, vawi khat fight a hmachhawnah hian Rs. 70,000 a hlawh ang. Hnehna a chan chuan Rs 70,000 a hlawh belh dawn bawk a, hei bakah hian kal man leh thlenna senso zawng zawng tumsak a ni dawn bawk a ni. 

MFL (Mizoram Fight League) flyweight champion lai PMS-a chuan, "Hnehna chan ngei ka beisei a, chutiang tur pawh chuan ngawrh takin inbuatsaihna kan kalpui mek a ni," tiin Vanglaini  a hrilh. PMS-a contract ziahna Brave hian ram 14-ah event an nei kual ṭhin a, ram 40 aṭangin contract fighter an nei bawk. Kawrtethawveng tlangval-te fight neih tur hi MTV-ah live-in a en theih ang.