Ramthar Veng an 'comeback'

I Day Football-ah nimin khan Ramthar Vengin inkhel hmuhnawm bik an pho chhuak a, Reliance Foundation Young Champs (RFYC) academy laka goal hnih an chhuah hnuah 3-2 in an lehthal. HC Zarzoliana hoten match hnihah an khingpui hneh ve vein quarterfinal an lut.

RG Stadium-a inkhelah India rama rawlthar ṭha rual awm khawmna RYFC an tlangnel nghal a, chhun pachanga inkhel a nichungin inkhel a nung ṭha hle. Ramtharin an nawr na a, mah se first half injury time-ah RYFC-in counter attack aṭangin an khung. Faris-a'n mual vei lam aṭangin a lalut a, khalh muang hret mah se amah vengtu lak aṭanga talputin goal hmahruai a khung.

Mumbai-a innghat academy-in second half-ah pawh bul an ṭan ṭha zawk a, Faris-a cross ṭha zet chu Arjun Singh-a'n minute 56-naah goal-ah a chantir. Goal hnih chhuah hnuah Ramthar Veng ben harhin an awm a, coach Zara hote an nung ṭha chiah.

Goal luh aṭanga minute thumnaah Lalawmpuia'n Ramthar Veng tan siphurh a sut ṭhen a, RYFC an talbuai. Ramthar Vengin nawr chhunzawmin minute 60-naah substitute Lalrinchhana hmangin an khung lehnghal a, goal hmahruai khungtu AwP-a'n a kheng let ṭha hle.

Zara hote an phur chhunzawm a, minute 70-naah Remruata'n chakna goal a khung. Ramthar Veng captain Remruata finishing a ṭha a, ball petu PC Lalruatsanga ball pek a ṭha hle. MPL kai thar Ramthar an ṭang tluan a, 3-2 a chakin quarterfinal an lut.