Liverpool-in Barcola dawr dawn

Premier League club Liverpool chuan Paris St-Germain forward Bradley Barcola la lut turin hma an la ṭan dawn a, he thu buatsaih a nih lai hian an dawrna zat chiah la chiang lo mah se, Reds hian an dawr dawn tih an tichiang tawh.

Merseyside club hian an player ropui Mohamed Salah chu free transfer-in an chhuahtir a, Salah hmun ruak hnawhkhah chu thil theih loh tluka ngaih ni mah se, Reds thuneitute hian fans lungawi nan tal pawh player langsar tak lakluh an tum sa.

Hetihrual hian France international hi a man a tlawm dawn lo tih a chiang a, PSG lam chuan pound maktaduai 145 an chhiar. Mahse, Reds thuneitu lam hian £100mtd hnaih deuh thuaka lakluh theih an inbeisei.

Barcola hian PSG-ah kum hnih dang khelh chhunzawm turin contract a la nei mek a, mahse, France tan pawha bul ṭan fo forward hian a duh anga a khelh tam loh avangin chhuah a pawi ti lo.

Reds-in an duh tih a hriat hian Barcola hian Anfield pan hi a pawi ti lo nia sawi a ni lehzel a, amah berin Liverpool pan a duh avangin English club-in £100mtd aia tlawma lei theih an inbeisei pawh hi a awm hle.

French club lar Lyon aṭanga a professional zinkawng zawh ṭantu Barcola hian season hman zawh takah khan PSG tan inelna hrang hrangah match 49 khelin goal 13 a khung a, assist vawi sarih a nei tel - heng zinga match 14-ah hian bench aṭangin a lut a, vawi 27 lakchhuah a ni bawk.

Liverpool hian a tirah chuan RB Leipzig forward Yan Diomande lakluh an tum a, mahse, German club-in an dawrna an hnar hnuah an inhnukdawk zui a, Ivorian forward hi Real Madrid zawm turin a inbuatsaih mek.