Champions League - Liverpool inlan zan

European football-a club inelna sang ber Champions League chu zaninah khelh a ni leh dawn ta a, Premier League club Liverpool leh Chelsea an inlan dawn. 

Champions League champion lai Liverpool chuan Group E inkhelah  zanin dar 1:30 hian Genk an mikhual dawn a, Anfield-a inkhel tur an nih avangin Reds hi chak chiang sa deuhthawa dah theih an ni. Chelsea tan game a hautak dawn. Frank Lampard naute hian Stamford Bridge-ah zan dar 1:30 hian Ajax an mikhual dawn a, Dutch club hi an la ṭhat reng avangin a harsa ang. 

Blues leh Ajax hian point ruk ve ve an nei a, an hnuaiah zanin dar 1:30-a Lille mikhual tur Valencia an la awm ve bawk avangin group H boruak hi a 'hot' hle. 

Liverpool-in kartawp Premier League match pawimawhah Manchester City an hmachhawn a ṭul dawn a, Champions League-a an dinhmun a la him bawk si loh avangin Jurgen Klopp tan player rem thiam a harsa ang. Hriat tel atana ṭha erawh Genk hi khualmuala 4-1 a an sawp theih team kha a ni a, an huphurh dawn lo. Roberto Firmino, Sadio Mane leh Mohamed Salah te zingah Firmino emaw Salah an chawlh hahdam a rinawm a,  Divock Origi tan hmun a awm dawn tihna a ni. 

Tlarhnung an inrem danglam vak a rinawm lo a, Trent Alexander Arnold aia Joe Gomez dah lut thei erawh a ni. Midfield hi Reds hausakna a ni a, Alex Oxlade-Chamberlain leh James Milner-te hmuh a beiseiawm. Reds hian match thum aṭangin point ruk an nei a, hmahruaitu Napoli point khatin an phak lo - an hnuaiah point thum nei RB Salzburg an awm bawk a, a tawi zawnga sawi dawn chuan rilru hahdam hma nan chak ngei ngei an mamawh. 

Chelsea-in tun hnaiah result an nei ṭha a, an phur vanglai takin Ajax an mikhual dawn - mahse Dutch club hi an match hnuhnung pahniha goal riat khung an ni a, an phur vanglai tak a ni ve tho. Zanin inkhel hmuhnawmna belhchhahtu tur chu an point hmuh zat in ang hi a ni - match thum an khelhah point ruk ve ve an nei a, zanina chak zawk tan group hmahruaitu nihna kawng a inhawng. 

Chu mai a ni lo - Valencia-in Lille an hneh chuan point sarih an nei ang a, a chak lo zawk chu table-ah tlanpelin pahnihna an ni dawn tihna a ni a, hei hi Blues leh Ajax-in thlentir an duh dawn lo ve ve. Chelsea hian khualmualah Ajax hi 1-0 in an lo va hneh tawh a, mahni muala inkhel tur an nih bawk avangin inrintawkna nen Dutch club an mikhual ang. 

Chelsea lawmna thlen turin tun hnaiah Christian Pulisic chuan a theihna a pholang a, a match hnuhnung pahnihah goal li a khung - Ajax tan 'Captain America' hi ven bik a sual lo ang.  

Blues tan striker Tammy Abraham 'form' vanglai a ni a, tun season match 16-ah goal 10 a khung tawh - Frank Lampard-a'n Pulisic leh Abraham hi chawlhtir pawh ni se Callum Hudson-Odoi leh Michy Batshuayi an la awm cheu. 

Season hmasa Champions League semifinalist Ajax-in an chet ṭhat kha tihpalh thil a ni lo tih pholangin an hmuhnawm chhunzawm zel a, tun season match 19-ah vawi khat chiah an la tlawm - an ngam loh awmchhun erawh Chelsea an ni. 

Dutch club tan Dusan Tadic leh Hakim Ziyech an la ṭangkai reng a, Real Madrid nena sawizawm hlawh reng Donny van de Beek leh David Neres te pawh English club chhaih mangang turin an ṭha tawk.