Silver medal vawi hnih dawngtu Sreeshankar

Commonwealh Games neih mekah Nilaini zan khan Murali Sreeshankar chuan mipa 'long jump'-ah pahnihna niin silver medal a la a, 2022 khan Birmingham-ah silver medal tho a lo tawh bawk. Sreeshankar hi Commonwealth Games-ah India tan long jump-a medal pahnih la thei hmasa ber a ni.

Kerala tlangval hian metre 8.09 zuang thlengin tichhe hran lo mah se, Jamaica aiawha tel Tajay Gayle a tluk loh avangin a zawnin silver medal a dawng. Gayle hian metre 8.15 zet a zuang thleng.

Kum 27 mi Sreeshankar chuan, "Silver ka la leh thei hi ka lawm a, mahse ka duh ber chu gold a nih avangin ka la lungawi lo. India tana gold hlawh chhuak thei nih ka duh takzet a, mahse a la hun lo a ni ang e," a ti a, gold la hlawh chhuak ngei a tum.

Sreeshankar te chhungkua hian infiamnaah sulhnu an nei ṭha hle. A pa S. Murali-a hi triple jump-a tel ṭhin a ni a, South Asian Games-ah silver medallist a ni tawh. A nu K. S. Bijimol-i pawh kum 1992-a Asian Junior Athletics Championships-ah khan metre 800 intlansiaknah silver medal a lo la tawh bawk. A farnu Sreeparvathy pawh infiamna lamah kalin ani erawh heptathlon lam a ni thung.

A pa kaihhruaina hnuaian Sreeshankar hi inzirin, kum 10 hnuai lam metre 50 leh metre 100 intlansiakah te a lo champion tawh a, kum 13 a tlin hnuah long jump a luhchilh ve chauh.

Kum 2022 khan World Athletics Championships-ah pasarihna a hauh a, hemi hnu lawk hian Birmingham-a Commonwealth Games-ah metre 8.08-a thui zuangin silver medal a la. 2023 khan Indian infiammi zinga chawimawina sang ber dawttur 'Arjuna Award' a lo dawng tawh nghe nghe.