Kalvin Phillips a chhuak leh dawn

Manchester City midfielder Kalvin Phillips chu loan bawkin a chhuak leh dawn a, Enzo Maresca hnuaia pre season tour-ah a tel loh hnuin English midfielder hi season hmasaa loan-a a khelhna Sheffield United-ah bawk a kal leh dawn niin khawthlang chanchinbuten an ziak.

Kum 30 mi Phillips hi an 2022 khan pound maktaduai 42 zetin Leeds United aṭangin City a pan a, mahse a khelhna position-ah khawvela ṭha ber zinga mi Rodri a awm avangin hmun a chang lo. West Ham leh Ipswich Town-ah te loan-in chhuak mah se Elland Road-a a khelh dan a pha tawh lo.

Phillips hian Etihad Stadium-ah kum hnih daih contract la nei mah se, pre season squad-a a tel loh hnuah Sheffield an lo lang nghal a, Blades manager Chris Wilder chuan Phillips hi lak luh tumin a ngaihven leh nghal.

Wilder hian season hmasaa a lo lak luh tawh player hi lâk luh leh a duh a, Phillips hian Blades tan match thum chiah a inlan a, a match hnuhnung ber Steel City derby-a Sheffield Wednesday an hneh tum khan red card hmuin a hmuh avangin hnawhchhuah a ni nghe nghe.

Kum 58 mi Wilder-a chuan, "Phillips hi hliam a neih avangin a vanduai ṭhin a, mahse player thiam tak a nih avangin club tam takin lak an la duh. A agent leh City nen kan inrem thei a nih chuan thawhho leh kan châk takzet," tiin Phillips a la dah sang hle.

Leeds midfielder hlui hian City tan match 32 chiah a la khel a, a nghetin la chhuahtir lo mah se a tan Etihad Stadium-ah beisei tur a awm tawh lo angah a ngaih theih. A vanglai hun a liam ve mai tawh dawn a, club tharah a career siam ṭhat leh tumin a beih a fuh tawk zawk mai thei.