Verstappen-a'n Antonelli a fak

Red Bull driver Max Verstappen chuan Formula 1 season kal meka table hmahruaitu, Andrea Kimi Antonelli chu season chanve an hman chinah a fak a, Dutch driver hian Mercedes driver chet dan chu 'a nghet ṭha' a tih thu a sawi.

Kum 28 mi Verstappen chuan, "Kuminah Antonelli a che ṭha takzet a, a chet ṭhat dan hi a nghet a midang chunga awm hi a phu. Kum 19 mi chauh ala ni a, a kum phu loin a puitling a, hmabak êng tak a nei a ni," tiin Italian driver a dah sang hle.

Kum 19 mi Antonelli hian tum season-ah vawi ruk zet hnehna a chang tawh a, vawi kua podium a lawn tawh bawkin F1 chanchinah hmahruaitu naupang ber a ni. Antonelli hian track ṭhenkhatah harsatna tawk mah se a inthlahdah ngai lo a, amah hnaih bertu Lewis Hamilton nen point 50 zetin an inthlau.

Dutch driver chuan a chungchang sawiin, "Kumin chu kan tan kum ṭha tia sawi tur a ni lo a, ka la insiamrem thei lo a ni ber. Mahse kan hmabakah hian nuam ti taka intlansiak hmachhawn ka tum. Ka duhthusam leh ka thil duh lohte chu ka sawi hnem tawk tawh a, phunchiar pawh min ti hial mai thei," a ti.

Verstappen hian season ṭan dawnah khan F1 dan tharte chu a lo sawisel nasa tawh a, a chet ṭhat loh bawk avangin F1 chhuahsan a tum angin thuthang a awm hman hial. Mahse Verstappen-a dinhmunin ziaawm lam a pan deuh a, podium vawi li lawn ve tawhin pakhatna a la ni lo thung.

Hetihlai hian Antonelli teammate George Russell chu beisei a phâk loh a, a teammate a chet ṭhat bawk si avangin Mercedes-ah a dinhmun a nghing nia sawi a awm a, Verstappen-a'n a thlak dawn tih hialin thuthang a awm hman.

British driver Russell-a dinhmun chhiat laia a teammate Antonelli, Verstappen-a'n a lo fak hi a tan thil hriat nuam a ni dawn lo a, Mercedes-a a tlaktlum theihna turin a chet ṭhat a ngai ang.