I Day Football-ah ṭhumvawr a ngai dawn!

Nimin khan I Day Football group stage-ah Saikhamakawnin Manipur club Ganggam SC chu 2-0 in an hneh a, quarterfinal an lut. Lalrindika kaihhruai SKK leh Mizoram Police te hi 1-1 in an inhnehtawk tawh a, Manipur club laka an chakna zat a inan leh chiah avangin point, goal difference bakah goal khung zatah an inang vek a, ṭhumvawr hmangin group B hmahruaitu zawn a ni dawn.

RG Stadium-a inkhelah hian Ganggam SC-in chak nei loa haw tum loin theihtawp chhuah mah se Manipur club tan Mizo club an ṭha mah mah. Chutihrualin SKK goal hmahruai dan erawh vanneih vang liau liau a ni. Tibuaitu nei lo Ganggam defender Lalnuntluanga'n keeper chhuak hmu loin goal-ah a pet a, goal ruakah a lut.

Rindika hoten goal venhim hna thawk zuiin remchang an neih apiangin counter attack hmangin an nawr let a, minute 88-naah an hlawhtling. Midfielder John Lalrinawma ball vawrh fing zet chu right back Jonathan Lallianchawia'n changin goalkeeper kap karah a khung a, Saikhamakawn chak nemnghehna goal a khung.