Duleep Trophy-ah Ruata, Joseph leh Rempuia

Duleep Trophy 2026 khel tur North East Zone team-ah Mizoramin player pahnih Ramhlun Venglai batter Joseph Lalthankhuma leh Champhai bowler Lalrempuia te an thawh a, Ramhlun Venglai all rounder K. Vanrotlinga chu standby-ah a awm. Durtlang pa K. Vanlalruata chu assistant coach atan ruat a ni bawk.

Joseph hi Mizoram senior team captain a ni a, season liam ta khan plate group-ah batter che ṭha ber zinga mi a ni. Rempuia hi spinner zinga wicket la hnem ber a ni thung. Ruata hian Mizoram cricket tana sulsutu hmasa a ni a, season liam ta khan Mizoram tan assistant coach hna ṭha takin a thawk.

Duleep Trophy hi Zone hrang hrang East Zone, West Zone, South Zone, North Zone, NorthEast Zone leh Central Zone-ah te ṭhen a ni a, inelna hi August 23, 2026 hian Bengaluru-a Centre of Excellence-ah khelh tur a ni.

NorthEast team aiawh thlang tute hi North East Zonal Selection Committee te an ni a, Mizoram (CAM) aṭangin honorary president Robert Lalfamkima leh honorary secretary Lalfakawma Varte te an tel. Mizoram hian cricket-ah hma a sawn chho zel a, cricket khel hmasa India state tam zawk el pha lo mah se NorthEast team dangte erawh an el pha tawh thung.

Mizoram assistant coach leh Vanglaini-a Silly point ziaktu Ruata chuan, "Team ṭha leh player ṭha kan tum dawn a. Kan naute NorthEast ho tan chuan inzirna vek a ni dawn. Chutihrual chuan nikum khan India leh IPL player hlang awmna Central Zone pawh kan draw ve tawh a, kan inkar hi a zim ve telh telh," tiin Vanglaini a hrilh.

NE Zone hian August 23, Pathianni hian East Zone an hmachhawn dawn a, match khat hi ni li chhung zel khelh a ni. East Zone-ah hian India player Ishan Kishan a captain a, vice captain atan Vaibhav Sooryavanshi ruat a, IPL best player ni lai kum Sooryavanshi hi kum 15 mi chauh a la ni. Mizo player pahnih telna NE Zone hian August 8, Inrinni aṭangin Dimapur, Nagaland-ah training camp an ṭan ang.