Milan leh Italy football icon Baresi a thi

Khawvel defender ropui ber zinga mi Franco Baresi chu Ningani khan kum 66 mi niin a thi a, football khawvel tan channa lian tak a ni. Baresi hian a damchhungin club pakhat AC Milan tan chauh a khel a, Italy tan sulhnu ṭha tak a hnutchhiah bawk.

AC Milan chuan, "Franco Baresi thihna avangin Milan mittui a luang. A entawntlakna leh rinawmna hi a jersey no. 6 serh hran a nih ang chiahin he club thinlungah hian a bet reng tawh ang," tiin an ui thu an tarlang a, Baresi sulhnu thlirin Italian club fakna rimawi hmuh hi a phu reng a ni.

Baresi hi Brescia-ah May 8, 1960 khan a piang a, AC Milan academy aṭanga inzir chhoin kum 17 mi lek a nihin 1977–78 season season khan senior team tan a khel ṭan. Centre back ṭha mi Baresi hian Milan tan a hun pum a hmang a, sulhnu pawh a nei ṭha hle.

Milan tan Baresi hian season 15 chung captain armband a hreng a, match 719 khelh sakin goal 33 a khung. Kum 1977 aṭanga khel ṭanin kum 1997 thleng a khel a, Baresi hian Serie A nomawi vawi ruk bakah Champions League nomawi vawi thum a chawi.

Italy tan pawh Baresi hian match 81 a khel a, 1982 World Cup.-a an champion ṭum khan squad-ah a tel a, 1994 World Cup-ah khan captain hna chelhin final-ah Brazil lakah an vanduai. Kum 2020 khan AC Milan-ah honorary vice president hna a chelh a, a jersey no. hak ṭhin no. 6 chu tumah hak theih tawh lo tura dah hran a ni.

Milan legend Baresi hian August 2025 khan a chuapah bawk a awm avangin zai a ni a, mipui hmaa a inlan hnuhnun ber chu kumin February thlaa Milan khelmual San Siro-a Winter Olympic kha a ni. Baresi hi khawvel club ropui zinga Milan awm theih nan tha a thawh hlawk a, club pawhin an ui hle.

Italian club chuan, "AC Milan thinlung leh thlarau chelhtu kan chân thu han puan chhuah chu thil harsa tak a ni. Mahse, club-a thawk zawng zawng leh Milanisti zawng zawngte hian Franco Baresi hriatrengna zahawm tak hi kan chhawm nung tlat tur a ni.

'Franco hriatreng nan lungrual takin kan ding tlat a, kan Rossoneri kal zelna turah min kaihruaiin hma lam min pantir reng dawn tih kan hria a ni. Chatuan atan. A chhan chu Baresi chu chatuan mi a ni si a," tiin defender ropui hi an thlah.