India leh Brazil an inkhel dawn
World champion vawi nga ngawt ni thei Brazil chuan India nen friendly match an khel dawn a, October 3 hian Kolkata-ah Blue Tigers hian Brazil hi an lo mikhual dawn a ni.
Brazil-in Kolkata-a match an neih tur thu hi hun engemaw chen chu a thang tawh a, Ningani khan Brazilian media-te chuan India nena an inkhelh tur thu an pholang.
Mahse, phai lam media ṭhenkhat chuan hei hi thuthang dik tawk lo a nih thu sawiin, Brazil chu India-a inkhel tura tih ni mah se, Blue Tigers ni loin, South American team nen an inhmachhawn tur thu an sawi.
Mahse, Ningani zan khan All India Football Federation (AIFF) chuan thuchhuah siamin, Brazil leh India ten October 3, Inrinni zanah friendly match an khelh tur thu an pholang - Salt Lake Stadium, Kolkata-ah an inkhel dawn.
Brazilian Football Confederation (CBF) lam pawhin thuchhuah siam vein, Australia nen September-a an inkhelh zawhah India an pan tur thu an sawi a, Blue Tigers nena an inkhelh tur thu an puang.
Carlo Ancelotti enkawl Brazil hi FIFA ranking-ah pangana ni mekin, 138-na dinhmun luah mektu Blue Tigers-in kum 1992-a FIFA ranking siam a nih hnua team an hmachhawn tur zinga ranking sang ber an ni.
AIFF deputy secretary general M Satyanarayan chuan, "Brazil ang team ropui kan mikhual thei tur hi thil lawmawm tak a ni a, Indian football chanchinah hriatreng a ni tawh dawn a ni," a ti.
Indian football team director Subrata Paul chuan, "Kan national team player-te tan chuan hei hi match hlu bik a ni dawn a, khawvela football ram ropui ber hmaah an theihna tak tak pholanna chance an nei dawn a ni.
"Hetiang ang tawnhriat ṭha hian player-te nasa takin a pui thei a, an career chhung zawnga hriat reng tawh tur a hnutchhiah dawn a ni," a ti a, India-a Brazil lo zin tur chu lawmawm a tih thu a sawi.
Brazil hian tun hma angin Ronaldo, Kaka, Ronaldinho te nei tawh lo mah se, Vinicius Jr, Raphinha, Marquinhos, Gabriel leh Alisson te ho an la nei a, anni ho hi an hruai tel a nih chuan damchhunga sawi tlak inkhel enna chance kan bul hnai maiah a awm dawn tihna a ni.