City laka 'comeback' beisei Ole

Zanin dar 1:15-ah Manchester derby kan hmu dawn a, Manchester City chuan League Cup semifinal second leg-ah Manchester United an mikhual dawn. 

Old Trafford-a first leg inkhelah 3-1 in Manchester City an chak a, December 7 khan Premier League match-ah Etihad Stadium-ah 2-1 in United an lo chak tawh. United boss Ole Gunnar Solskjaer chuan, "December-a kan result khan he hmunah hian tih theih kan nei tih min hrilh a, City aia goal hniha kan khung tam chuan chak theih dan kan nei tih hriain kan khel ang," a ti. 

Pep Guardiola enkawl City hi khawvela team ṭha pawl an ni a, goal hnih phur saa khel tur United hi an 'comeback' theih ringtu an tam lo - Ole ngaihdan a dang thung. Red Devils hian season hmasa Champions League round of 16-ah khan team ṭha  Paris St-Germain chu Old Trafford-ah an ngam lo a, second leg-ah thilmak thlentirin khualmualah 3-1 in an chak daih!

Ole chuan he thil thleng hi la theihnghilh loin, "Thawnthu hlui ngaihtuah let a ṭul a, Paris St-Germain laka kan khelh dan kha kan hre reng tur a ni," a ti a, an thiamna ngaihtuah let turin a naute a duh. United hian hliam vangin Paul Pogba leh Scott McTominay an la chhawr thei dawn lo a, tlarhmaa United player neih hriam bera chhal ngam Marcus Rashford chu inlan thei lo tur chiang a ni. 

Solskjaer hian Inter Milan-a loan-a khel mek Alexis Sanchez chungchang pawh a sawi a, "Chilean forward hi a lo kir leh ang a, a theihna tak tak a pholang ang," a ti! United-in an dawr mek Sporting Lisbon attacking midfielder Bruno Fernandes chungchangah thu thar a awm loh thu a sawi a, chhuak tur anga sawi inhliam mek defender Marcos Rojo chu a chhuah loh tur thu a sawi bawk.