India gold pathumna Dilip-a'n hlawh chhuak

Commonwealth Games neih mekah India tan Dilip Gavit chuan Ningani khan, para athletics-ah metre 100 intlansiakah pakhatna niin gold medal a hlawh chhuak a, inelna kal meka India gold pathumna chiah a ni.

Taksaa rualban lohna neite tana an buatsaihah hian, Maharashtra tlangval Dilip hian metre 100 chu second 10.71 chhungin a tlan thleng. Pahnihna Mohammed Basil Morssinganakath (10.83) aiin second khat pawh tling loin a thleng hmasa zawk. Silver medalist Basil pawh hi Indian tho a ni.

Kum 21 mi Dilip hi Maharashtra-a khaw te tak te Toran Dongari-ah a piang a, a chhungte hi lo neia eizawng an ni. Dilip hian kum nga chauh a nih laiin vanduaina a tawk a, thingkung aṭanga a tlakna lamah a ban ding lam a tina. An khuaah a enkawlna tur a awm mai loh a, doctor an panpui hnuah a ban hi a lo thih tawh avangin a kiu chinah an tansak.

A ban tan a nih hnuah pawh Dilip hian infiamna lam a chawlhsan chuang lo a, inter school athletics-ah coach Vaijanath Kale-a'n a theihna sanzia a hmu a, Dilip-a te chhungkuain sum lamah harsatna tawk mah se training a neihna turah engkim a buaipuisak.

Kale hnuaiah nasa zawka a inzir hnuin 2022 khan a tan hun ṭha a inherchhuak a, Asian Para Games, China-a neihah a tel. Hemi ṭum hian 400 metre race-ah pakhatna niin gold medal a dawng a, Asian Para Games-a India medal 100-na a ni bawk. Dilip pawhin an intlansiak zawhah Kale zahna lantirin, "He gold medal hi ka zirtirtu ta tur a ni," tiin a sawi.

Inelna neih mekah India hia gold pathum, silver 10 leh bronze medal pali an la tawh a, infiammi 10 chuangin inelna an la hmachhawn dawn avangin medal dawn zat hi a la pun leh a rinawm. Medal la dawng thei zingah Olympic champion Neeraj Chopra pawh a la awm.