Delap-a'n duhtu a ngah

Chelsea striker Liam Delap chuan duhtu a ngah a, Premier League club hlirin ngaihvenin Leeds United, Nottingham Forest leh Everton ten English forward hi lak luh an duh vek.

Kum 23 mi Delap hian nikum lawk khan Ipswich Town aṭangin Blues hi pound maktaduai 30-in a zawm a, beiseina sang tak nen Stamford Bridge pan mah se a che ṭha tawk lo. Season hmasa khan inelna hrang hrangah match 41 khel mah se goal hnih chiah a khung.

Table-ah 10-na ni chungin Blues hian season an khar a, manager pahnih an hrawn hman bawk. Season tharah indinthar an tum a, anmahi enkawl turin Real Madrid coach hlui Xabi Alonso an la lut tawh.

Spanish coach hian Blues lo enkawl tawhte tih loh dan angin player kum upa leh tawnhriat ngah - Jordan Henderson leh Danny Welbeck te a la lut a, Delap-a dinhmun a nghingah a ngaih nghal theih.

Blues hian Delap bakah Joao Pedro, Nicolas Jackson, Liam Delap, Emanuel Emegha, Marc Guiu, David Datro Fofana, Devid Washington, Shumaira Mheuka leh Dastan Satpayev te an nei a, Welbeck-a'n a rawn belh dawn bawk avangin an inpaih thawl a rinawm.

Delap hian a club khelh tawhnaah theihna sang tak a nei tih a lantir tawh a, hei vang hian duhtu a tlachham lo. Toffees leh Forest chuan Delap hi an hnaih zual a, Leeds thawm a zawi ber. Hetihrual hian Chelsea chuan Delap manah hian £40 mtd an chhiar niin khawthlang chanchinbute chuan an sawi.