Garcia leh Palacios Fulham-in an hnaih

Premier League club Fulham chuan Real Madrid aṭanga Gonzalo Garcia leh Cesar Palacios te la lut turin inremna an nei tawh a, player pahnih manah hian euro maktaduai 50 bawr vel an seng dawn niin Fabrizio Romano-a'n a tarlang.

Club pahnihte inremnaah chuan Garcia hi €40mtd in an la dawn a, Palacios hi €10mtd an thehchhuak dawn bawk. Fulham hian player pahnihte hmun dangah an chhuahitr leh a nih chuan, an hralhna aṭangin 30% chu Real in an chang dawn.

Fulham hi an coach Marco Silva-a'n Benfica-ah Jose Mourinho thlak turin a chhuahsan a, Mourinho a enkawl ve dawn thung. Los Blancos-a Mourinho-a'n a thlak tak Alvaro Arbeloa chu Fulham hian an lo la ve chiah bawk.

Kum 43 mi Arbeloa-a'n Real a enkawl laiin Garcia a chhawr nasa a, inelna hrang hrangah match 39 khelin goal kua a khung. Mahse Kylian Mbappe a awm avangin a tan 'first choice' nih ngaihna a awm lo a, a pu hlui zuiin Craven Cottage-ah a insawn dawn.

Garcia ang bawkin kum 21 mi Palacios-a'n Craven Cottage pan a thlang a, Spanish midfielder hian theihna sang tak nei mah se Santiago Bernabeu-ah rinrawl a nih phâk a inrin loh avangin, hmun chan tam theihna tura a rin lam a pan.

Cottagers hi an striker rinrawl Raul Jimenez chu a contract a tawp tawh avangin a chhuak tawh a, season hmasaa club tana goal khung hnem ber Harry Wilson-a'n Leeds United a zawmsan bawk. Tlarhma lama khel tur an mamawh laia Garcia leh Palacios te an la lut thei hi an tan chanchin lawmawm bik a ni.