Bayern-in goal 15 an khung

German champion Bayern Munich chuan season thar atan an inbuatsaihna inkhelah Ningani zan khan, amateur club Rottach-Egern chu 15-0 zetin an sawp a, Vincent Kompany naute an chak nuamsa hle.

Bayern tan Aleksandar Pavlovic, Arijon Ibrahimovic, Felipe Chavez, Maicon Cardozo, Armindo Sieb leh Bastian Assumu ten goal hnih ṭheuh an khung a, Joao Palhinha, Joshua Kimmich leh Iskander Nouraye ten goal khat ṭheuh an thawh ve bawk.

Pre season-ah Bayern leh Rottach-Egern te hi 2018 aṭang khan vawi nga an lo inhmachhawn tawh a, an intawn tawhnaa an goal khung belhkhawm hi 99-3 lai a ni. Tuna an inkhelh hi goal a luh tlem ber ṭum a ni a, 2024 khan 14-1 in an lo chak tawh bawk. Goal luh hnem ber ṭumin 2023 khan 27-0 in Bayern hian an sawp.

Bavarians senior player zingah Sven Ulreich, Minjae Kim, Sacha Boey, Tom Bischof, João Palhinha ten bul an ṭan a, season hmasa lama loan-a chhuak Arijon Ibrahimovic, Armindo Sieb, Felipe Chávez te chu rawn kirin bul an ṭan. Kompany naute hian August 4, Thawhlehni tlai dar 4:30-ah Jeju nen an inhmachhawn leh dawn a, Jeju Island, South Korea panin an chhuak leh nghal dawn. Bavarians hian Jeju bakah Aston Villa leh RB Leipzig te chu friendly match an la neihpui dawn bawk.

August 29, Inrinni zana season thar atana an match hmasa ber an khelh hmain, August 23, Pathianni zanah Borussia Dortmund nen DFF-Supercup final an khel ang.