Infiamna rilru pu chungin infiamna kan hmachhawn tur a ni - Lalrinawma

Legislative Assembly deputy speaker Lal­rinawma chuan nimin khan a bial chhung, Chhingchhip Mualpuiah Lalpianthanga Memorial Volleyball Tournament a hawng. Thu sawiin, "Infiammite hian infiamna rilru pu chungin infiamna kan hmachhawn tur a ni a, theihtawp kan chhuah tur a ni," a ti.

Lalrinawma chuan, Mizote'n mahni Mizopuite ngei ngaihsan an thiam a pawimawh thu sawiin, "Hmanlai Mizote chu hnam inngaihlu tak an ni a, ní leh thla kara léng inti ngat niin, mahni kea ding, mi dangte khai chhuah ngaia awm duh lo an ni. Nula leh tlangvalte pawh taimak, tlawmngaih leh huaisena inel ṭhin an ni a, tlangvalte'n ral raih inhuamin khawtlang tan an thawk ṭhin," a ti a; hmànlaia Mizote nun dan phung ṭhate chu tunlaiah neih thar leh a ṭul thu a sawi.

Assembly Dy. Spea­ker chuan, Mizote tana Pathian­in a pek nun­phungte chu a ṭha tâwk tih sawiin, "Keimahni kan inngaihsan loh a, kan hnam pasalṭhate kan ngaihsan loh chuan tu hnam mahin min ngaisang dawn lo. Hming sak chungchangah pawh, sakhuana vanga hming sak chu thuhran ni se, keimahni hnam hming sak dan phung hi kan mawipui ber a ni. Ka ṭha ber a ni tih inpawm tlang ila, keimahni inngaih hniam a, hnam dang dah sanna rilru hi kan paih bo a ṭul," a ti bawk.

Lalpianthanga Memorial Volleyball Tournament hi November 9, 2019 thleng neih a ni dawn a, Tuikum constituency chhunga mipa volleyball team 15 an inel dawn a ni.