Newcastle-in Hornicek an la lut

Premier League club Newcastle United chuan Braga aṭangin goalkeeper Lukas Hornicek an la lut a, Czech Republic international goalkeeper man atan hian Magpies hian pound maktaduai 25.7 an seng.

Kum 24 mi Hornicek hian kum nga daih contract a ziak dawn a, tun kar tawp hian engkim tihfel hman beisei a ni. Czech keeper hian Spain-a Newcastle training camp chu a zawm ve nghal ang.

Czech Republic keeper hma hi tun nipuia Magpies player thar pangana a ni a, ani hma hian hi Ewen Jaouen, Bazoumana Toure, Sean Steur leh Aladji Bamba te an lo la lut tawh.

Hornicek chuan, "Newcastle-in min duh tih ka hriat tirh khan ka lawm em em a, ka phur takzet a ni. Newcastle hi club lian tak a ni a, mipui 50,000 chuang hmaa kar tin inkhelh ka châk tawh hle," a ti.

Magpies hian season hmasa khan beisei an pha lo a, goal 55 zet chhuahin 12-na ni chungin season an khar. Goal chhuah lama an harsatna su kiang turin Hornicek hi an la a, Nick Pope leh Aaron Ramsdale te nei mah se an duh khawp lo a, Hornicek hi 'first choice' tur a nih a rinawm.

Newcastle hi an manager Eddie Howe-a'n a chhuahsan a, Al-Ahli manager Matthias Jaissle an beisei mek. August 8, Inrinni zan dar 12:30-ah Valencia nen an inhmachhawn dawn a, manager tharin a kaihhruai hman beisei a ni.